நல்ல தூக்கத்திற்காகப் பல வழிகளைத் தேடுபவர்களுக்கு, தற்போது இணையத்தில் வைரலாகி வரும் 'இருட்டில் குளிக்கும் முறை' (Dark Showering) ஒரு வரப்பிரசாதமாகப் பார்க்கப்படுகிறது. பல இணையவாசிகள் இருளில் குளிப்பது தங்களுக்குப் புதிய அனுபவத்தைத் தருவதாகவும், ஒருமுறை இதைச் செய்து பார்த்தால் மீண்டும் மீண்டும் செய்யத் தூண்டும் அளவிற்கு மனதிற்கு இதமாக இருப்பதாகவும் சமூக ஊடகங்களில் காணொளிகளைப் பகிர்ந்து வருகின்றனர்.
மூளையை அமைதிப்படுத்தும்
ஒளிக்கும் மனித மூளையின் செயல்பாட்டிற்கும் நெருங்கிய தொடர்பு இருப்பதாக அமெரிக்காவின் கலிபோர்னியா மாநிலத்தைச் சேர்ந்த மனநல மருத்துவர் டேனியல் ஏமென் (Daniel Amen) விளக்குகிறார். மங்கலான வெளிச்சத்திலோ அல்லது இருளிலோ குளிக்கும்போது, கண்களுக்குக் கிடைக்கும் தூண்டுதல்கள் (Visual input) குறைகின்றன. இதனால் சிதறிக்கிடக்கும் கவனம் ஒருநிலைப்பட்டு, அது ஓய்வெடுப்பதற்கான நேரம் என்பதை மூளை சட்டென்று புரிந்துகொள்கிறது.
யாருக்கெல்லாம் இது உதவும்?
அதிகப்படியான வேலைப்பளுவால் ஏற்படும் மன அழுத்தம், பதற்றம் மற்றும் தூக்கமின்மை (Insomnia) பிரச்சினையால் அவதிப்படுபவர்களுக்கு இந்த முறை மிகச்சிறந்த தீர்வாக அமையும் என்று டாக்டர் ஏமென் பரிந்துரைக்கிறார். செயற்கை வெளிச்சம் இல்லாத சூழலில் குளிப்பது மனநிலையைச் சீராக்கி, ஆழ்ந்த உறக்கத்திற்கு உடலைத் தயார்படுத்துகிறது.