வேலை மற்றும் குடும்பப் பொறுப்புகளுக்கு இடையே பெண்கள் தங்களின் உடல்நலனைப் பெரும்பாலும் கவனிக்கத் தவறிவிடுகிறார்கள். இது ஹார்மோன் சமநிலையின்மை மற்றும் மன அழுத்தம் போன்ற பாதிப்புகளை ஏற்படுத்துகிறது. பிரபல நடிகை சமந்தா உடனான ஒரு கலந்துரையாடலில், ஊட்டச்சத்து நிபுணர் ராஷி சவுத்ரி பெண்களின் ஆரோக்கியத்தை மேம்படுத்தும் நான்கு முக்கியமான பழக்கங்களை விளக்கியுள்ளார்.
அதன்படி, உணவைத் தொடங்கும் போது நேரடியாக மாவுச்சத்து அல்லது சர்க்கரை நிறைந்த உணவுகளை உண்ணாமல், முதலில் ஆரோக்கியமான கொழுப்புகள் கொண்ட நெய், பருப்பு வகைகள் அல்லது தயிர் போன்றவற்றை உட்கொள்வது இரத்த சர்க்கரை அளவு திடீரென அதிகரிப்பதைத் தடுக்கும். இது நாள் முழுவதும் ஆற்றலைச் சீராக வைத்திருக்க உதவும்.
புரதச் சத்தும் நார்ச்சத்து சமநிலையும்
பெண்களிடையே காணப்படும் முடி உதிர்தல் மற்றும் தசை பலவீனம் போன்ற பிரச்சனைகளுக்குப் புரதக் குறைபாடே முக்கியக் காரணமாகும். எனவே, ஒவ்வொரு வேளை உணவிலும் முட்டை, பருப்பு வகைகள் அல்லது டோஃபு போன்ற புரதம் நிறைந்த உணவுகளைச் சேர்ப்பது அவசியம். அதேபோல், செரிமானம் மற்றும் உடல் எடையைச் சீராக வைத்திருக்க நார்ச்சத்து மற்றும் கார்போஹைட்ரேட் இடையே சரியான சமநிலையைப் பராமரிக்க வேண்டும்.
காய்கறிகள் மற்றும் முழு தானியங்களை உணவில் அதிகம் சேர்ப்பதன் மூலம் தேவையற்ற தொப்பை கொழுப்பைக் குறைப்பதோடு செரிமான மண்டலத்தையும் பலப்படுத்த முடியும் என்று ராஷி சவுத்ரி பரிந்துரைக்கிறார்.
இரவு உணவின் நேரமும் தூக்கத்தின் தரமும்
உடல்நலத்தைப் பாதிக்கும் மற்றொரு முக்கியமான காரணி தாமதமான இரவு உணவு ஆகும். தூங்குவதற்குச் சுமார் 3 மணி நேரத்திற்கு முன்னதாகவே இரவு உணவை முடித்துக் கொள்வது உடல் உறுப்புகளுக்குப் போதுமான ஓய்வை அளிக்கும். சீக்கிரம் சாப்பிடும் பழக்கம் ஆழ்ந்த தூக்கத்திற்கு வழிவகுப்பதோடு, ஹார்மோன்களைச் சமநிலைப்படுத்தி காலையில் புத்துணர்ச்சியுடன் எழ உதவும்.
இந்த நான்கு எளிய வாழ்வியல் மாற்றங்களைத் தொடர்ந்து கடைப்பிடித்தால், அன்றாட உடல்நலப் பிரச்சினைகளிலிருந்து 70 சதவீதம் வரை நிவாரணம் பெற முடியும் என நிபுணர்கள் உறுதிபடத் தெரிவிக்கின்றனர்.