இன்றைய நவீன வாழ்க்கை முறையில், கெட்ட கொலஸ்ட்ரால் (LDL) அதிகரிப்பு என்பது பலரையும் பாதிக்கும் ஒரு முக்கியச் சுகாதாரப் பிரச்சினையாக மாறியுள்ளது. குறிப்பாக, ஆரோக்கியமற்ற உணவுப் பழக்கவழக்கங்கள் மற்றும் போதிய உடற்பயிற்சியின்மை ஆகியவை இதற்கான முக்கியக் காரணங்களாக மருத்துவர்கள் எச்சரிக்கின்றனர். கொழுப்பு நிறைந்த உணவுகளை அதிகமாக உட்கொள்வதும், துரித உணவுகளை (Fast Foods) விரும்பிச் சாப்பிடுவதும் உடலில் கெட்ட கொலஸ்ட்ரால் அளவை உயர்த்துகிறது. ரத்தத்தில் LDL அளவு அதிகரித்தால், இதய நோய் மற்றும் பக்கவாதம் போன்ற உயிருக்கு ஆபத்தான நோய்கள் ஏற்படும் அபாயம் அதிகரிக்கிறது.
கொலஸ்ட்ராலின் முக்கியத்துவம்:
கொலஸ்ட்ரால் என்பது கல்லீரலால் உற்பத்தி செய்யப்படும் உடலுக்குத் தேவையான ஒரு மெழுகு போன்ற பொருளாகும். இது உடலின் ஒவ்வொரு செல்லிலும் காணப்படுகிறது. உடல் இயற்கையாகவே இதனை உற்பத்தி செய்தாலும், நாம் உட்கொள்ளும் உணவுகள் மூலமாகவும் இது கிடைக்கிறது. நல்ல கொழுப்புகள் (HDL) உடலுக்கு இன்றியமையாதவை என்றாலும், அதிகப்படியான கொழுப்பு உணவுகள் கெட்ட கொலஸ்ட்ராலை (LDL) ரத்த நாளங்களில் படியச் செய்து பாதிப்பை உண்டாக்குகின்றன.
கெட்ட கொலஸ்ட்ரால் அதிகரிக்கக் காரணங்கள்:
அதிகக் கொழுப்பு கொண்ட உணவுகள், உடற்பயிற்சி இல்லாத வாழ்க்கை முறை, மரபணு காரணங்கள் (குடும்ப ஹைப்பர் கொலஸ்ட்ரோலீமியா), மற்றும் சில குறிப்பிட்ட மருந்துகள் (இதய நோய், நீரிழிவு, ஹார்மோன், மனநலம் தொடர்பானவை) ஆகியவை கொலஸ்ட்ரால் அளவை உயர்த்துகின்றன. இதுதவிர, அதீத மன அழுத்தம் மற்றும் தூக்கமின்மை போன்றவையும் கெட்ட கொலஸ்ட்ரால் அதிகரிக்க முக்கியக் காரணங்களாக அமைகின்றன.
கட்டுப்படுத்த உதவும் உணவுகள்:
தானியங்கள்: வைட்டமின்கள், கனிமங்கள் மற்றும் நார்ச்சத்து நிறைந்துள்ளதால் கெட்ட கொலஸ்ட்ராலைக் கட்டுப்படுத்த உதவுகின்றன.
நட்ஸ் (முந்திரி, பாதாம்): இவை இதய ஆரோக்கியத்தை மேம்படுத்தி, ரத்தத்தில் உள்ள LDL அளவைக் குறைக்கின்றன
மீன்கள்: ஒமேகா-3 (Omega-3) கொழுப்பு அமிலம் நிறைந்த மீன்கள், கெட்ட கொழுப்பைக் குறைத்து நல்ல கொழுப்பை உயர்த்துகின்றன.
அவகாடோ: இதில் உள்ள ஒற்றை நிறைவுறா கொழுப்புகள் (Monounsaturated fats) மற்றும் நார்ச்சத்து LDL-ஐக் குறைக்க உதவும்.
பூண்டு: மருத்துவக் குணங்கள் நிறைந்த பூண்டு, ரத்த அழுத்தத்தைக் கட்டுப்படுத்தி கொலஸ்ட்ராலைக் குறைக்க உதவுகிறது.
பருப்பு வகைகள்: இவற்றைத் தொடர்ந்து உணவில் சேர்த்து வருவது இதய ஆரோக்கியத்திற்குப் பாதுகாப்பானது.
வாழ்க்கை முறை மாற்றங்கள்:
தினமும் 30 முதல் 45 நிமிடங்கள் வரை உடற்பயிற்சி செய்தல், 7 முதல் 8 மணி நேரம் ஆழ்ந்த உறக்கம், மன அழுத்தத்தைக் குறைக்கும் பயிற்சிகள் மற்றும் புகைபிடித்தல், மது அருந்துதல் போன்ற பழக்கங்களைத் தவிர்ப்பது அவசியமாகும். ஒட்டுமொத்தமாக, சீரான உணவுப் பழக்கவழக்கங்களும், ஆரோக்கியமான வாழ்க்கை முறையும் கடைப்பிடிக்கப்பட்டால், கெட்ட கொலஸ்ட்ரால் அளவைக் கட்டுக்குள் வைத்து இதய நோய்களில் இருந்து நம்மைப் பாதுகாத்துக் கொள்ள முடியும் என நிபுணர்கள் தெரிவிக்கின்றனர்.