இன்றைய நவீன வாழ்க்கை முறையில் மொபைல் போன் மற்றும் கணினி பயன்பாடு அதிகரித்துள்ள நிலையில், கழுத்து வலி பலருக்கும் பொதுவான பிரச்சனையாக மாறியுள்ளது. குறிப்பாக நீண்ட நேரம் ஒரே நிலையில் தலைகுனிந்து வேலை செய்வது, தவறான உட்காரும் முறை மற்றும் சரியான தூக்க நிலை இல்லாமை போன்ற காரணங்களால் கழுத்துத் தசைகள் இறுக்கமடைந்து வலி தீவிரமடைகிறது என மருத்துவ நிபுணர்கள் எச்சரிக்கின்றனர்.
கழுத்து என்பது உடலின் முக்கிய உறுப்புகளில் ஒன்றாகும். மூளையையும் உடலின் பிற பகுதிகளையும் இணைக்கும் முக்கிய நரம்புகள் கழுத்துப் பகுதியில் அமைந்துள்ளதால், இந்த பகுதியில் ஏற்படும் பாதிப்புகள் உடலின் முழு செயல்பாடுகளையும் பாதிக்கக்கூடும் என தெரிவிக்கப்படுகிறது.
கழுத்து வலிக்கு முக்கிய காரணங்கள்
தவறான உடல்நிலையில் நீண்ட நேரம் அமர்ந்து வேலை செய்வது, தொடர்ந்து மொபைல் போன் பார்ப்பது, கணினி திரையை கீழே நோக்கி பயன்படுத்துவது போன்றவை கழுத்து வலிக்கு முக்கிய காரணங்களாக கருதப்படுகின்றன.
மேலும் தவறான நிலையில் உறங்குதல், பழைய காயங்கள், கழுத்து சுளுக்கு, கீழே விழுதல், மோதல் விளையாட்டுகளில் ஈடுபடுதல் போன்ற காரணங்களாலும் கழுத்து வலி ஏற்படலாம்.
சில சமயங்களில் இந்த வலி சாதாரணமாக இருந்தாலும், விபத்து அல்லது காயம் காரணமாக ஏற்பட்டால் உடனடி மருத்துவ கவனிப்பு தேவைப்படும் என நிபுணர்கள் கூறுகின்றனர்.
பொதுவாக காணப்படும் அறிகுறிகள்
கழுத்து வலி ஏற்பட்டால் பல்வேறு அறிகுறிகள் காணப்படலாம். அவற்றில் முக்கியமானவை: கழுத்தை அசைப்பதில் சிரமம், தசைப்பிடிப்பு மற்றும் தசை இறுக்கம், கடுமையான அல்லது குத்தும் தன்மை கொண்ட வலி, தலைவலி, தலைசுற்றல், தோள்பட்டை மற்றும் கைகளுக்கு பரவும் வலி, வாகனம் ஓட்டும்போது அல்லது கணினியில் வேலை செய்யும்போது அதிகரிக்கும் வலி போன்றவை அடங்கும்.
பெரும்பாலான கழுத்து வலிகள் தானாகவே குறையும்
கழுத்து வலி உண்மையில் இருப்பதை விட அதிகமாக பயமுறுத்தக்கூடியதாக உணரப்படலாம். ஆனால் பெரும்பாலான சந்தர்ப்பங்களில் வீட்டு வைத்தியங்கள் மற்றும் ஓய்வு மூலம் வலி தானாகவே குறைந்து விடும் என மருத்துவர்கள் தெரிவிக்கின்றனர்.
எனினும், வலி தொடர்ந்து நீடித்தால், கைகளுக்கு பரவினால், உணர்வின்மை ஏற்பட்டால், கடுமையான தலைசுற்றல் இருந்தால் உடனடியாக மருத்துவரை அணுக வேண்டும் என அறிவுறுத்தப்படுகிறது.
வீட்டு வைத்தியங்கள் மூலம் நிவாரணம்
கழுத்து வலியை குறைக்க சில எளிய முறைகள் உதவக்கூடும்.
குளிர் மற்றும் வெப்ப ஒத்தடம்
வலி உள்ள பகுதியில் மெதுவாக தேங்காய் எண்ணெய் தடவி மசாஜ் செய்த பிறகு ஐஸ்கட்டி அல்லது குளிர்ந்த ஒத்தடம் அல்லது வெந்நீர் ஒத்தடம் கொடுத்தால் தசைப்பிடிப்பு குறைந்து நிவாரணம் கிடைக்கும்.
சரியான உட்காரும் முறை
கணினி திரையை கண் மட்டத்தில் வைத்து வேலை செய்வது கழுத்தில் ஏற்படும் அழுத்தத்தை குறைக்கும். நீண்ட நேரம் ஒரே நிலையில் அமர்ந்து வேலை செய்வதை தவிர்க்க வேண்டும்.
கழுத்து உடற்பயிற்சி
மெதுவான கழுத்து அசைவுகள் மற்றும் மருத்துவர் பரிந்துரைக்கும் உடற்பயிற்சிகளை தொடர்ந்து செய்வது கழுத்து தசைகளை வலுப்படுத்தி வலியை குறைக்க உதவும்.
பிசியோதெரபி மற்றும் மசாஜ்
பிசியோதெரபி மூலம் செய்யப்படும் மசாஜ் மற்றும் முதுகெலும்பை சீரமைக்கும் பயிற்சிகள் கழுத்து வலியை குறைக்க பயனுள்ளதாக இருக்கும் என கூறப்படுகிறது.
உறங்கும் முறை முக்கியம்
கழுத்து வலியை தவிர்க்க சரியான மெத்தை மற்றும் தலையணை பயன்படுத்துவது அவசியம். மிக உயரமான அல்லது மிகவும் கடினமான தலையணைகளை தவிர்க்க வேண்டும். கழுத்துக்கு ஏற்ற மென்மையான தலையணை பயன்படுத்துவது நல்லது என நிபுணர்கள் பரிந்துரைக்கின்றனர்.
மருத்துவர் ஆலோசனை இல்லாமல் மருந்துகள் வேண்டாம்
கழுத்து வலி ஏற்பட்டவுடன் மருத்துவர் ஆலோசனை இல்லாமல் மருந்துகளை எடுத்துக்கொள்ளக் கூடாது என மருத்துவர்கள் எச்சரிக்கின்றனர். வலியை குறைக்க திடீர் அசைவுகளை தவிர்த்து போதிய ஓய்வு எடுப்பதும் அவசியம்.
பெரும்பாலான கழுத்து வலி பிரச்சனைகளுக்கு அறுவை சிகிச்சை தேவைப்படாது என்றாலும், வலி கடுமையாக இருந்தால் அல்லது நீண்ட நாட்கள் தொடர்ந்தால் உடனடியாக மருத்துவரை அணுகுவது அவசியம் என நிபுணர்கள் வலியுறுத்துகின்றனர்.