சிறியவர்கள் முதல் பெரியவர்கள் வரை அனைவராலும் விரும்பப்படும் மாம்பழம், சுவை மற்றும் மணத்தில் தனித்தன்மை பெற்றதாகும்.
மேலும் சீசன் தொடங்கியதால் தற்போது, சந்தைகளில் பங்கனபள்ளி, ருமானி , இமாம்,சிந்துரா , அல்போன்சா, மல்கோவா , நீலம் போன்ற பல்வேறு ரகங்கள் அதிகளவில் கிடைக்கின்றன. ஒவ்வொரு ரகத்திற்கும் தனித்துவமான சுவை மற்றும் மணம் இருப்பதால், மக்கள் ஆர்வத்துடன் வாங்கி வருகின்றனர்.
ஊட்டச்சத்து வளம் நிறைந்த மாம்பழம்
மாம்பழம் பல்வேறு வைட்டமின்கள் மற்றும் தாதுக்கள் நிறைந்த ஒரு இயற்கை உணவாகும். இதில் வைட்டமின் C, வைட்டமின் A, இரும்புச் சத்து, பொட்டாசியம், கால்சியம், சோடியம், ஜிங்க், காப்பர் போன்ற முக்கிய சத்துக்கள் அடங்கியுள்ளன. இதனால் உடலின் நோய் எதிர்ப்பு சக்தி அதிகரிக்க உதவுகிறது.
செரிமான ஆரோக்கியத்திற்கு உதவும்
மாம்பழத்தில் உள்ள நார்ச்சத்து செரிமான அமைப்பை சீராக வைத்திருக்க உதவுகிறது. குறிப்பாக மலச்சிக்கலைத் தடுப்பதிலும், குடல் செயல்பாட்டை மேம்படுத்துவதிலும் இது முக்கிய பங்கு வகிக்கிறது.
கண் ஆரோக்கியத்தை மேம்படுத்தும்
மாம்பழத்தில் உள்ள வைட்டமின் ஏ மற்றும் பீட்டா-கரோட்டின் கண் ஆரோக்கியத்திற்கு மிகவும் அவசியமானவை. இவை வயது சார்ந்த பார்வை குறைபாடுகளைத் தடுக்க உதவுகின்றன.
இரத்த சர்க்கரை கட்டுப்பாட்டில் உதவி
இயற்கை சர்க்கரை கொண்டிருந்தாலும், மாம்பழத்தை அளவோடு எடுத்துக்கொண்டால் இரத்த சர்க்கரை அளவை திடீரென அதிகரிக்காது என்று நிபுணர்கள் கூறுகின்றனர். இதில் உள்ள நார்ச்சத்து சர்க்கரை உறிஞ்சுதலை மெதுவாக்கி, சர்க்கரை அளவை கட்டுப்படுத்த உதவுகிறது. இருப்பினும் சர்க்கரை நோயாளிகள் மருத்துவர் பரிந்துரையின் பேரில் எடுத்துக்கொள்வது சிறந்தது.
இதய மற்றும் உடல் ஆரோக்கியத்திற்கு
மாம்பழம் உடலிலுள்ள கொழுப்பை குறைக்கவும், இதய ஆரோக்கியத்தை மேம்படுத்தவும் உதவுகிறது என்று ஆய்வுகள் தெரிவிக்கின்றன. சீரான உணவுப் பழக்கத்தில் மாம்பழத்தை சேர்ப்பது பல நன்மைகளை அளிக்கும்.
உடல் எடை குறைப்பு
மாம்பழத்தை உணவுக்கு முன் எடுத்துக்கொள்ளும்போது வயிறு நிறைந்த உணர்வை தருகிறது. இதனால் அதிக உணவு உட்கொள்ளுதல் குறைந்து, உடல் எடையை கட்டுப்படுத்த உதவுகிறது.
இரத்த சோகையைத் தடுக்கும்
மாம்பழத்தில் உள்ள இரும்புச் சத்து, இரத்த சோகை பிரச்சினை உள்ளவர்களுக்கு நன்மை அளிக்கிறது. மேலும் இதில் உள்ள வைட்டமின்கள் உடலுக்கு தேவையான சக்தியை வழங்குகின்றன.
மொத்தத்தில், பல்வேறு ஊட்டச்சத்துக்களை ஒருங்கே வழங்கும் மாம்பழம், இயற்கையான “சூப்பர் ஃபுட்” ஆக கருதப்படுகிறது. கோடை காலத்தில் சுவையுடன் ஆரோக்கியத்தையும் வழங்கும் இந்தப் பழம், மக்களின் அன்றாட உணவில் முக்கிய இடத்தைப் பெற்றுள்ளது.