கோடை வெயிலை வெல்லும் எளிய வழிகள்: உடல் ஆரோக்கியத்தைக் காக்கும் அற்புத டிப்ஸ்!

தமிழகத்தில் கோடை வெயிலின் தாக்கம் நாளுக்கு நாள் அதிகரித்து வருகிறது. கத்தரி வெயில் எனப்படும் அக்னி நட்சத்திரம் முடிவடைந்தாலும், வெப்பத்தின் தீவிரம் குறைந்தபாடில்லை. இந்த கடுமையான வெயிலில் இருந்து நம் உடலைப் பாதுகாக்கவும், நீர்ச்சத்து குறையாமல் ஆரோக்கியமாக இருக்க பின்பற்ற வேண்டியது மிக முக்கியம்.

நீர்ச்சத்து மேலாண்மை

வெயில் காலத்தில் நம் உடலில் இருந்து வியர்வை வழியாக அதிகப்படியான நீர்ச்சத்தும், தாது உப்புகளும் வெளியேறுகின்றன. இதை ஈடு செய்ய வேண்டியது மிக அவசியம். தாகம் எடுக்கும் வரை காத்திருக்காமல், ஒரு நாளைக்குக் குறைந்தது 3 முதல் 4 லிட்டர் தண்ணீர் குடிப்பதை வழக்கமாக்கிக் கொள்ளுங்கள். வெளியே செல்லும்போது எப்போதும் தண்ணீர் பாட்டில் கையில் இருக்கட்டும்.

செயற்கைக் குளிர்பானங்களைத் தவிர்த்து இளநீர், பதநீர், கம்மங்கூழ், மற்றும் மோர் ஆகியவற்றைத் தொடர்ந்து சேர்த்துக் கொள்ளுங்கள். இவை உடலுக்குத் தேவையான எலக்ட்ரோலைட்டுகளை இயற்கையாகவே வழங்கும்.

சாதாரண தண்ணீரில் சிறிது எலுமிச்சை சாறு மற்றும் புதினா இலைகளைப் போட்டு டிடாக்ஸ் வாட்டர் ஆகக் குடிக்கலாம். இது உடலை சுறுசுறுப்பாக வைத்திருக்க உதவும்.

கோடைகால உணவு முறைகள்

வெயில் காலத்தில் செரிமான மண்டலம் சற்று மந்தமாக இருக்கும். எனவே, எளிதில் செரிமானமாகும் உணவுகளுக்கே முன்னுரிமை தர வேண்டும்.

தர்பூசணி, முலாம் பழம், வெள்ளரிக்காய், கிர்ணி பழம், மற்றும் ஆரஞ்சு போன்ற பழங்களை அதிகம் உணவில் சேர்த்துக் கொள்ளுங்கள். காரமான, எண்ணெய் மிகுந்த, வறுத்த மற்றும் அசைவ உணவுகளைக் கோடையில் குறைப்பது நல்லது. இவை உடலின் வெப்பத்தை மேலும் அதிகரிக்கும். காலையில் பழைய சாதம் அல்லது கஞ்சி குடிப்பது உடலுக்குக் குளுமையையும், குடலுக்குத் தேவையான நல்ல பாக்டீரியாக்களையும் தரும்.

சருமம் மற்றும் கண் பாதுகாப்பு

சூரியனின் UV Rays சருமத்தையும் கண்களையும் நேரடியாகப் பாதித்து, கட்டிகள் மற்றும் அலர்ஜியை ஏற்படுத்தும். இறுக்கமான ஆடைகளைத் தவிர்த்து, தளர்வான, வெளிர் நிற பருத்தி ஆடைகளை அணியுங்கள். இது வியர்வையை உறிஞ்சி காற்றோட்டமாக இருக்க உதவும்.வெயிலில் வெளியே செல்லும் போது, கைகள் மற்றும் முகத்தில் SPF 30+ உள்ள சன்ஸ்கிரீன் லோஷனைப் பயன்படுத்துவது சரும சுருக்கங்களைத் தடுக்கும். நண்பகல் நேரப் பயணங்களின் போது கறுப்புக் கண்ணாடி மற்றும் குடை அல்லது தொப்பி அணிவது அவசியம்.

உடல் வெப்பத்தைக் குறைக்க காலை மற்றும் இரவு என இருமுறை சாதாரண குளிர்ந்த நீரில் குளிப்பது உடலுக்கும் மனதிற்கும் புத்துணர்ச்சி தரும். அதிகப்படியான தலைவலி, தலைச்சுற்றல், மயக்கம், நாக்கு வறட்சி அல்லது தசைப்பிடிப்பு ஏற்பட்டால், அது அம்மை அல்லது வெப்பத்தாக்கத்தின் அறிகுறியாக இருக்கலாம். தாமதிக்காமல் மருத்துவரை அணுகவும்.