கோடை வெப்பத்தின் தாக்கத்தைக் குறைக்க உதவும் இயற்கை பானங்களில் லஸ்ஸி முக்கிய இடத்தைப் பிடிக்கிறது. தயிரிலிருந்து எளிதாகத் தயாரிக்கப்படும் இந்த பாரம்பரியப் பானம், உடலுக்குக் குளிர்ச்சியையும் அத்தியாவசிய ஊட்டச்சத்துகளையும் வழங்குவதால் வெயில் காலங்களில் பலராலும் விரும்பிக் குடிக்கப்படுகிறது.
ஊட்டச்சத்து மற்றும் செரிமானம்
லஸ்ஸியில் உள்ள நன்மை பயக்கும் பாக்டீரியாக்கள் (Probiotics) குடல் ஆரோக்கியத்தைப் பாதுகாத்து, நோய் எதிர்ப்பு சக்தியை அதிகரிக்கின்றன. இதிலுள்ள லாக்டிக் அமிலம் உடலில் தீங்கு விளைவிக்கும் கிருமிகளை எதிர்த்துப் போராட உதவுகிறது. மதிய உணவிற்குப் பிறகு ஒரு கிளாஸ் லஸ்ஸி அருந்துவது மலச்சிக்கல், வயிற்றுப்போக்கு மற்றும் வயிறு உப்புசம் போன்ற பிரச்சனைகளைக் குறைத்து செரிமானத்தை மேம்படுத்துவதாக மருத்துவ நிபுணர்கள் தெரிவிக்கின்றனர்.
எலும்பு பலம் மற்றும் உடல் எடை
குறைந்த கொழுப்பு மற்றும் அதிக புரதம் கொண்ட லஸ்ஸி, உடல் எடையைக் கட்டுப்படுத்த விரும்புவோருக்குச் சிறந்த தேர்வாகும். இதிலுள்ள அதிகப்படியான கால்சியம் எலும்புகள் மற்றும் பற்களை வலுப்படுத்துவதோடு, வயதான காலத்தில் ஏற்படும் எலும்புத் தேய்மானத்தைத் தடுக்கவும் உதவுகிறது.
ஆற்றல் மற்றும் ரத்த அழுத்தம்
வைட்டமின் B12 நிறைந்த லஸ்ஸி, உடலில் உள்ள குளுக்கோஸை ஆற்றலாக மாற்றுகிறது. இதனால் சோர்வு நீங்கி உடனடி புத்துணர்ச்சி கிடைக்கிறது. மேலும், இதிலுள்ள பொட்டாசியம் ரத்த அழுத்தத்தைச் சீராக வைத்திருக்க உதவுவதால், உயர் ரத்த அழுத்தம் உள்ளவர்களுக்கு இது ஒரு மருந்தாகக் கருதப்படுகிறது.
எச்சரிக்கை மற்றும் பக்க விளைவுகள்
லஸ்ஸி பல்வேறு நன்மைகளைக் கொண்டிருந்தாலும், அதைப் பயன்படுத்தும் முறையில் கவனம் தேவை என மருத்துவர்கள் எச்சரிக்கின்றனர்:
சர்க்கரை அளவு: அதிக சர்க்கரை சேர்க்கப்பட்ட லஸ்ஸி உடல் எடையை அதிகரிக்கச் செய்யும்.
நேரம்: இரவு நேரங்களில் லஸ்ஸி குடிப்பதைக் தவிர்க்க வேண்டும். இது சளி மற்றும் இருமல் பாதிப்புகளை உண்டாக்கலாம்.
நீரிழிவு மற்றும் ஆஸ்துமா: சர்க்கரை நோய் மற்றும் ஆஸ்துமா பாதிப்பு உள்ளவர்கள் இனிப்பு லஸ்ஸியைத் தவிர்ப்பது நல்லது.
சிறுநீரகப் பிரச்சனை: அதிக உப்பு மற்றும் மசாலா சேர்த்துக் குடிப்பதைக் கட்டுப்படுத்த வேண்டும், இல்லையெனில் சிறுநீரக உபாதைகள் அதிகரிக்க வாய்ப்புள்ளது.
மொத்தத்தில், கோடை காலத்தைப் ஆரோக்கியமாகக் கடக்கத் தினமும் ஒரு கிளாஸ் லஸ்ஸியை அளவோடு அருந்துவது சிறந்தது.