இன்றைய டிஜிட்டல் உலகில் பேருந்து, ரயில் பயணம் முதல் நடைப்பயிற்சி வரை நமது காதுகளில் பிரிக்க முடியாத அங்கமாக ஹெட்ஃபோன்கள் மாறிவிட்டன. இசை கேட்பதற்கும், சினிமா பார்ப்பதற்கும் நமக்குத் துணையாக இருக்கும் இந்தச் சிறு சாதனங்கள், உண்மையில் நமது கேட்கும் திறனைச் சிதைக்கும் 'நிசப்தக் கொலையாளி'களாக மாறி வருகின்றன.
உலக சுகாதார அமைப்பின் (WHO) சமீபத்திய கணக்கெடுப்பின்படி, உலகளவில் சுமார் 110 கோடி இளைஞர்கள் காதுகேளாமை அபாயத்தில் உள்ளனர். முன்பு முதியோர்களை மட்டும் பாதித்த இந்தப் பிரச்சனை, தற்போது முறையற்ற ஹெட்ஃபோன் பயன்பாட்டால் குழந்தைகளையும் இளைஞர்களையும் குறிவைத்துத் தாக்கி வருகிறது.
மீட்க முடியாத பாதிப்புகள்
தொடர்ச்சியாக அதிக சத்தத்தில் ஹெட்ஃபோன்களைப் பயன்படுத்துவது காதுகளின் உட்பகுதியில் உள்ள 'காக்லியர் சென்சரி ஹேர் செல்களை' (Cochlear sensory hair cells) நிரந்தரமாகச் சிதைக்கிறது. மனித உடலில் உள்ள இந்த நுணுக்கமான செல்கள் ஒருமுறை அழிந்துவிட்டால், அவை மீண்டும் வளரவே வளராது. இதன் விளைவாகக் கேட்கும் திறன் நிரந்தரமாகப் பறிபோகிறது. இதுமட்டுமின்றி, காதுக்குள் எப்போதும் ஒருவித ரீங்காரம் அல்லது மணிச்சத்தம் கேட்டுக்கொண்டே இருக்கும். 'டினிடஸ்' (Tinnitus) பாதிப்பு, தலைச்சுற்றல் மற்றும் கூட்ட நெரிசலான இடங்களில் மற்றவர்கள் பேசுவதைப் புரிந்து கொள்ள முடியாமல் தடுமாறுவது போன்ற தீவிரப் பாதிப்புகள் ஏற்படுகின்றன.
தற்காத்துக் கொள்வது எப்படி?
பொதுவாக 70 டெசிபல் வரையிலான சத்தம் பாதுகாப்பானது எனக் கருதப்படுகிறது. ஆனால் நாம் பயன்படுத்தும் பெரும்பாலான ஹெட்ஃபோன்கள் 100 டெசிபல் வரை சத்தத்தை வெளியிடும் திறன் கொண்டவை. 85 டெசிபலுக்கு மேல் தொடர்ச்சியாக 8 மணிநேரம் சத்தம் கேட்டால், அது நிரந்தர செவிட்டுத்தன்மையை உருவாக்கும். இதனைத் தவிர்க்க வல்லுநர்கள் சில ஆலோசனைகளை வழங்குகின்றனர்:
60/60 விதி: சத்தத்தின் அளவை 60 சதவீதத்திற்குக் கீழ் வைத்திருங்கள்; ஒரு மணிநேரத்திற்கு மேல் (60 நிமிடம்) தொடர்ந்து பயன்படுத்த வேண்டாம்.
சரியான தேர்வு: காதுகளுக்குள் வைக்கும் ‘இன்-இயர்’ (In-ear) பட்ஸ் ரகங்களை விட, காதுகளை முழுமையாக மூடும் ‘ஓவர்-இயர்’ (Over-ear) ஹெட்ஃபோன்கள் சிறந்தது. இவை செவிப்பறையில் நேரடி அழுத்தத்தைக் குறைக்கும்.
அறிகுறிகள்: உங்கள் ஹெட்ஃபோன் சத்தம் அருகில் இருப்பவருக்குக் கேட்டால், நீங்கள் ஆபத்தான அளவில் சத்தம் வைத்துள்ளீர்கள் என்று அர்த்தம்.
சுகாதாரம்: தொற்றுநோய்களைத் தவிர்க்க உங்கள் சாதனங்களைத் தகுந்த இடைவெளியில் சுத்தம் செய்யுங்கள்.