வற்றாத செல்வ வளம், மங்களம் மற்றும் நற்செயல்களின் பலன் பல மடங்கு அதிகரிக்கும் புண்ணிய நாளாகக் கருதப்படும் அக்ஷய திருதியை இன்று (ஏப்ரல் 19) நாடு முழுவதும் பக்தி உணர்வுடன் கொண்டாடப்படுகிறது. “அக்ஷயம்” என்பது குறையாதது அல்லது அழிவில்லாதது என்று பொருள். இந்நாளில் செய்யப்படும் தானங்கள், பூஜைகள் மற்றும் புதிய தொடக்கங்கள் அனைத்தும் நிரந்தர பலனை தரும் என்பது பாரம்பரிய நம்பிக்கையாக உள்ளது.
ஆன்மிக முக்கியத்துவம்
சித்திரை மாத வளர்பிறை திருதியை நாளில் வரும் அக்ஷய திருதியை, சனாதன தர்மத்தில் மிக உயர்ந்த புண்ணிய தினங்களில் ஒன்றாகக் கருதப்படுகிறது. இந்த நாளில் தொடங்கப்படும் எந்த செயலும் வெற்றி மற்றும் வளம் தரும் என்பதால், புதிய தொழில் தொடக்கம், முதலீடு போன்றவற்றுக்கு இது உகந்த நாளாகப் பார்க்கப்படுகிறது.
புராணங்களின்படி, இந்த நாளில்:
பிரம்மா தனது சிருஷ்டி பணியை தொடங்கியதாகவும், பிரளயத்திற்கு பின் உலகம் மீண்டும் உருவானதாகவும், மகாலட்சுமி மற்றும் விஷ்ணுவின் அருள் பெருகும் தினமாகவும் கருதப்படுகிறது.
வழிபாடுகள் மற்றும் தானங்கள்
அக்ஷய திருதியை நாளில் விஷ்ணு மற்றும் மகாலட்சுமி வழிபாடு சிறப்பு வாய்ந்ததாக கருதப்படுகிறது. மஞ்சள் மலர்களால் பூஜை செய்து, மற்றும் தியானம் செய்வது செல்வ வளத்தை அதிகரிக்கும் என நம்பப்படுகிறது.
மேலும், தானங்கள் வழங்குவது மிகுந்த புண்ணியத்தை தரும் என கூறப்படுகிறது. குறிப்பாக அரிசி, பாசிப்பருப்பு, பழங்கள், பூக்கள், உப்பு, வெல்லம், உடைகள், நெய், சர்க்கரை, தண்ணீர் நிரம்பிய குடம் போன்றவற்றை ஏழைகள் மற்றும் தேவையுள்ளவர்களுக்கு வழங்குவது நல்ல பலனை தரும்.
தங்கம் வாங்கும் பாரம்பரியம்
அக்ஷய திருதியை நாளில் தங்கம் வாங்குவது செல்வம் பெருகும் அடையாளமாகக் கருதப்படுகிறது. இதனால், இந்த நாளில் தங்க விற்பனை அதிகரிப்பது வழக்கமாக உள்ளது. தங்க விலை உயர்வால், பலர் தங்க நகைகளை விட தங்க நாணயங்களை வாங்குவதில் ஆர்வம் காட்டுகின்றனர்.
தங்கம் வாங்க இயலாதவர்கள் கல் உப்பு, மஞ்சள், பச்சரிசி போன்றவற்றை வாங்கியும் வழிபடலாம். இவையும் மகாலட்சுமியின் அம்சமாகக் கருதப்படுகின்றன.
சுப முகூர்த்த நேரம்- பஞ்சாங்க கணிப்பின்படி
அக்ஷய திருதியை ஏப்ரல் 19 காலை 10:49 மணிக்கு தொடங்கி ஏப்ரல் 20 காலை 7:27 மணி வரை உள்ளது.
தமிழ்நாட்டில் தங்கம் வாங்க உகந்த நேரமாக காலை 10:49 மணி முதல் மதியம் 12:08 மணி வரை கருதப்படுகிறது. சூரிய உதய திதியை அடிப்படையாகக் கொண்டு பெரும்பாலான இடங்களில் இன்று (ஏப்ரல் 19) பண்டிகை கொண்டாடப்படுகிறது. வீடுகளில் பூஜைகள் செய்து, தானங்கள் வழங்கி, புதிய முயற்சிகளை தொடங்குவது வழக்கமாக உள்ளது.
மேலும் அக்ஷய திருதியை என்பது பொருள் மற்றும் செல்வத்திற்கான நாள் மட்டுமல்லாமல், தானம் மற்றும் நற்செயல்களின் முக்கியத்துவத்தை உணர்த்தும் ஆன்மிக திருநாளாகும். இந்த நாளில் செய்யப்படும் சிறிய நற்செயல்களும் நீண்ட கால நன்மைகளை அளிக்கும் என்பதால், பக்தியுடன் மற்றும் அர்த்தமுள்ளதாகக் கொண்டாடுவது முக்கியமானதாக கருதப்படுகிறது.