30+ பெண்கள் கவனிக்கவும்: எலும்புகளின் ஆரோக்கியத்தின் ரகசியம் கால்சியம்

உடல்நலத்தில் எலும்புகளின் வலிமையும் ஆரோக்கியமும் முக்கிய பங்கு வகிக்கின்றன. அதனை பாதுகாக்க சீரான உணவுமுறை மற்றும் போதுமான ஊட்டச்சத்துக்கள் அவசியம். குறிப்பாக கால்சியம் மற்றும் வைட்டமின் டி ஆகியவை எலும்புகள் மற்றும் பற்கள் ஆரோக்கியமாக இருக்க மிகவும் முக்கியமானவை என மருத்துவர்கள் வலியுறுத்துகின்றனர்.

மனித உடலில் போதுமான கால்சியம் இல்லாதபோது, உடல் எலும்புகளில் சேமிக்கப்பட்டுள்ள கால்சியத்தை பயன்படுத்தத் தொடங்குகிறது. இதனால் காலப்போக்கில் எலும்புகள் பலவீனமடைந்து, ஆஸ்டெயோபொரோசிஸ் போன்ற பிரச்சனைகள் உருவாகும் அபாயம் அதிகரிக்கிறது.

30 வயதுக்கு மேற்பட்ட பெண்களுக்கு அதிக அபாயம்

30 வயதிற்குப் பிறகு பெண்களில் ஹார்மோன் மாற்றங்கள் ஏற்படுகின்றன. குறிப்பாக ஈஸ்ட்ரோஜென் அளவு குறைவதால், உடல் கால்சியத்தை உறிஞ்சும் திறன் குறைகிறது. இதன் விளைவாக எலும்பு அடர்த்தி குறைந்து, எலும்பு தேய்மானம் ஏற்படும் அபாயம் அதிகரிக்கிறது.

மேலும் கர்ப்பம் மற்றும் தாய்ப்பால் கொடுக்கும் காலத்தில் பெண்களுக்கு கால்சியம் தேவையும் அதிகரிக்கிறது. இந்த காலங்களில் போதுமான கால்சியம் எடுத்துக்கொள்ளாதால் தாயின் உடல்நிலையும் பாதிக்கப்படலாம்.

கால்சியம் நிறைந்த உணவுகள்

மருத்துவ நிபுணர்கள் கூறுவதாவது, தினசரி உணவில் கால்சியம் அதிகமுள்ள உணவுகளை சேர்ப்பது அவசியம்.

பால் மற்றும் பால் சார்ந்த பொருட்கள் (பால், தயிர், சீஸ்), கீரைகள் (கேல், ப்ரோக்கோலி), தானியங்கள் மற்றும் ஆரஞ்சு சாறு, டோஃபு, சோயா பால், பருப்பு வகைகள், காய்கறிகள் (முட்டைக்கோஸ், கேரட், காலிஃபிளவர், ஓக்ரா), பழங்கள் (அத்திப்பழம், பேரிச்சம்பழம், ஆரஞ்சு, பப்பாளி) போன்ற உணவுகளை முறையாக உட்கொள்வதன் மூலம் கால்சியம் அளவை பராமரிக்க முடியும்.

கால்சியம் குறைபாட்டின் அறிகுறிகள்

கால்சியம் குறைவானால் உடலில் பல்வேறு அறிகுறிகள் தென்படலாம். தசை வலி மற்றும் பிடிப்பு, கை, கால்களில் மரத்தல் அல்லது நரம்பு பிரச்சனை, அடிக்கடி சோர்வு மற்றும் தூக்கமின்மை, முதுகு வலி மற்றும் எளிதில் எலும்பு முறிவு, நகங்கள் உடைதல், முடி உதிர்தல், மன அழுத்தம் மற்றும் பதட்டம் போன்றவை கால்சியம் குறைவானால் ஏற்படும் சில அறிகுறிகள் ஆகும்.

மேலும் பற்களின் ஆரோக்கியமும் பாதிக்கப்பட்டு, பலவீனம் மற்றும் குழிவுகள் ஏற்படும் அபாயம் அதிகரிக்கும்.

ஆரம்பத்திலேயே கவனம் அவசியம்

கால்சியம் குறைபாட்டை ஆரம்பத்திலேயே கண்டறிந்து சரி செய்வது மிகவும் முக்கியம். சரியான உணவுமுறை, உடற்பயிற்சி மற்றும் தேவையானபோது மருத்துவ ஆலோசனையுடன் ஊட்டச்சத்து மருந்துகள் எடுத்துக்கொள்வது எலும்பு மற்றும் உடல் நலத்தை பாதுகாக்க உதவும்.

இதன் காரணமாக, 30 வயதிற்கு மேற்பட்ட பெண்கள் தங்களது உணவுமுறையில் கால்சியம் மற்றும் வைட்டமின் டி நிறைந்த உணவுகளை சேர்ப்பது, ஆரோக்கியமான வாழ்விற்கான முக்கிய அடித்தளமாக கருதப்படுகிறது.