ஆர்.ஜே. பாலாஜி இயக்கத்தில் நடிகர் சூர்யா முதன்முறையாக இணைந்துள்ள ‘கருப்பு’ திரைப்படம் கோலிவுட்டில் பெரும் எதிர்பார்ப்பை ஏற்படுத்தியுள்ளது. இப்படத்தில் சூர்யா கதாநாயகனாக நடிக்க, இயக்குனர் ஆர்.ஜே. பாலாஜியே வில்லன் கதாபாத்திரத்தில் தோன்றி அதிரடி காட்டவுள்ளார். ட்ரீம் வாரியர் பிக்சர்ஸ் தயாரித்துள்ள இத்திரைப்படத்தில் த்ரிஷா, ஸ்வாசிகா, இந்திரன்ஸ், நட்டி நடராஜ், அனகா, மாயா, ரவி உள்ளிட்ட மிகப்பெரிய நட்சத்திர பட்டாளமே இணைந்துள்ளது. சாய் அப்கங்கர் இப்படத்திற்கு இசையமைத்துள்ளார்.
ரிலீசுக்கு முன்பே லாபம்
பெரும் எதிர்பார்ப்புகளுக்கு மத்தியில் வரும் மே 14-ஆம் தேதி ‘கருப்பு’ திரைப்படம் திரையரங்குகளில் வெளியாக உள்ளது. இந்நிலையில், இப்படத்தின் வியாபாரம் (Pre-Business) குறித்த அதிரடித் தகவல்கள் வெளியாகியுள்ளன. அதன்படி, திரையரங்க உரிமைகளைத் தவிர்த்து, ஓடிடி மற்றும் பிற உரிமைகள் மூலமாக மட்டுமே இப்படம் இதுவரை ரூ.110 கோடி வரை வசூலித்துள்ளதாகக் கூறப்படுகிறது.
சூர்யாவின் பலமான 'கம்பேக்'
சுமார் ரூ.130 கோடி பட்ஜெட்டில் பிரம்மாண்டமாக உருவாகியுள்ள இப்படத்திற்கு, ரிலீசுக்கு முன்பே 90 சதவீத முதலீடு திரும்பக் கிடைத்துவிட்டதாகத் தெரிகிறது. இதனால் தயாரிப்பு தரப்பு மிகுந்த உற்சாகத்தில் உள்ளது. சூர்யாவின் திரைப்பயணத்தில் ‘கருப்பு’ திரைப்படம் ஒரு முக்கிய மைல்கல்லாக அமைவதோடு, அவருக்கு ஒரு மிகச்சிறந்த 'கம்பேக்' திரைப்படமாகவும் அமையும் எனத் திரையுலகினர் எதிர்பார்க்கின்றனர்.