இந்திய கிரிக்கெட் அணியின் முன்னாள் கேப்டனும், ரசிகர்களால் அன்புடன் 'தாதா' என்றும் அழைக்கப்படும் சௌரவ் கங்குலியின் வாழ்க்கை வரலாற்றை மையமாகக் கொண்டு உருவாகும் "தாதா" பயோபிக் திரைப்படத்தின் படப்பிடிப்பு அதிகாரப்பூர்வமாகத் தொடங்கியுள்ளது. பாலிவுட்டின் திறமையான நடிகர் ராஜ்குமார் ராவ், கங்குலி கதாபாத்திரத்தில் நடிக்கிறார். இப்படத்தை பிரபல இயக்குநர் விக்ரமாதித்யா மோத்வானே இயக்க, லவ் ரஞ்சன் தயாரிக்கிறார்.
ஈடன் கார்டனில் முதல் நாள் படப்பிடிப்பு
கங்குலியின் கோட்டையாகக் கருதப்படும் கொல்கத்தா ஈடன் கார்டன்ஸ் மைதானத்தில் நேற்று இப்படத்தின் முதற்கட்டப் படப்பிடிப்பு தொடங்கியது. இது குறித்து நடிகர் ராஜ்குமார் ராவ் தனது சமூக வலைதளப் பக்கத்தில், “And it begins… The one and only #DADA” எனப் பதிவிட்டுத் தனது மகிழ்ச்சியைப் பகிர்ந்துள்ளார். இந்தப் புகைப்படம் தற்போது இணையத்தில் வைரலாகி வருகிறது.
கங்குலியின் பயணம்
இத்திரைப்படம், கங்குலியின் கேப்டன்சி காலம், இந்திய அணியை அவர் உலகத்தரம் வாய்ந்த அணியாக மாற்றிய விதம் மற்றும் நவீன இந்திய கிரிக்கெட்டின் வளர்ச்சியில் அவர் ஏற்படுத்திய தாக்கம் ஆகியவற்றை மையமாகக் கொண்டு பிரம்மாண்டமாக உருவாகிறது. முன்னதாக, 2025-ஆம் ஆண்டு அளித்த பேட்டி ஒன்றில் சௌரவ் கங்குலி, “எனது கதாபாத்திரத்திற்கு ராஜ்குமார் ராவ் மிகச்சரியான தேர்வு. அவருக்கு எனது முழு ஆதரவு உண்டு” எனத் தெரிவித்திருந்தது குறிப்பிடத்தக்கது.
வெளியீடு எப்போது?:
தற்போது ஏப்ரல் (2026) மாதத்தில் தொடங்கியுள்ள இந்தப் படப்பிடிப்பு விறுவிறுப்பாக நடைபெற்று வருகிறது. அனைத்துக் கட்டப் பணிகளும் முடிந்து, இப்படம் இதே ஆண்டு டிசம்பர் மாதத்தில் திரைக்கு வரும் என எதிர்பார்க்கப்படுகிறது. இந்திய கிரிக்கெட்டின் ஒரு பொற்காலத்தை மீண்டும் திரையில் காண ரசிகர்கள் ஆவலுடன் காத்திருக்கின்றனர்.