தமிழ் திரையுலகின் ஈடு இணையற்ற கலைஞன் நடிகர் திலகம் சிவாஜி கணேசனின் குடும்பத்திலிருந்து மற்றுமொரு நட்சத்திர வாரிசு சினிமா பயணத்தைத் தொடங்குகிறார். சிவாஜியின் மூத்த மகன் ராம்குமாரின் இரண்டாவது மகனான தர்ஷன் கணேஷன், 'லெனின் பாண்டியன்' என்ற திரைப்படத்தின் மூலம் கதாநாயகனாக அறிமுகமாகிறார். இயக்குநர் டி.டி. பாலச்சந்திரன் இயக்கும் இத்திரைப்படத்தை புகழ்பெற்ற சத்யஜோதி பிலிம்ஸ் நிறுவனம் சார்பில் செந்தில் தியாகராஜன் மற்றும் அர்ஜுன் தியாகராஜன் தயாரிக்கின்றனர். ஏற்கனவே பிரபு, விக்ரம் பிரபு மற்றும் துஷ்யந்த் ஆகியோர் திரையில் முத்திரை பதித்துள்ள நிலையில், தற்போது தர்ஷன் கணேஷனும் அந்த வரிசையில் இணைகிறார்.
கிராமத்துப் பின்னணியில் தத்ரூபமாக உருவாகும் இக்கதையில், ஆடு மேய்க்கும் முதியவர் ஒருவருக்குத் துப்பாக்கி ஏந்திய போலீஸ் பாதுகாப்பு அளிக்கப்படும் சுவாரஸ்யமான சம்பவமே மையக்கருவாக அமைந்துள்ளது. இதில் முதியவர் கதாபாத்திரத்தில் கங்கை அமரன் நடிக்க, அவருக்குப் பாதுகாப்பு அளிக்கும் போலீஸ் அதிகாரியாக தர்ஷன் கணேஷன் நடித்துள்ளார். இசைஞானி இளையராஜா இசையமைக்கும் இப்படத்தில் நடிகை ரோஜா, ஆடுகளம் நரேன், யுகேந்திரன் உள்ளிட்ட பல நட்சத்திரங்கள் முக்கியப் பங்கினை ஏற்றுள்ளனர். தற்போது படத்தின் இறுதிக்கட்டப் பணிகள் விறுவிறுப்பாக நடைபெற்று வரும் நிலையில், விரைவில் இப்படம் திரையரங்குகளில் வெளியாகும் என எதிர்பார்க்கப்படுகிறது.