தமிழ் திரையுலகில் 90களில் கனவு கன்னியாக ரசிகர்களை கவர்ந்த சிம்ரன், ‘வாலி’, ‘துள்ளாத மனமும் துள்ளும்’, ‘ஜோடி’ போன்ற பல வெற்றிப் படங்களின் மூலம் தனித்த இடத்தைப் பெற்றார். நீண்ட இடைவெளிக்குப் பிறகு தற்போது கதையின் மையமாக இருக்கும் கதாபாத்திரங்களைத் தேர்வு செய்து மீண்டும் சுறுசுறுப்பாக திரையுலகில் இயங்கி வருகிறார்.
சமீப காலங்களில் பேட்ட திரைப்படத்தில் ரஜினிகாந்த் உடன் நடித்ததும், சீம ராஜா படத்தில் சிவகார்த்திகேயன் உடன் தோன்றியதும், ‘டூரிஸ்ட் ஃபேமிலி’ படத்தின் யதார்த்தமான நடிப்பும் ரசிகர்களிடையே பெரும் கவனத்தை ஈர்த்தது. மேலும் துருவ நட்சத்திரம் படத்தில் விக்ரம் உடன் நடித்துள்ளதும் குறிப்பிடத்தக்கது.
இந்த நிலையில், பாலு சர்மா இயக்கும் ‘டீச்சர்’ என்ற புதிய படத்தில் சிம்ரன் மீண்டும் கதாநாயகியாக நடிக்கிறார் என்பது ரசிகர்களிடையே பெரும் எதிர்பார்ப்பை ஏற்படுத்தியுள்ளது. இந்த படம் கல்வி மற்றும் சமூக பொறுப்பு போன்ற முக்கியமான கருப்பொருள்களை மையமாகக் கொண்டு உருவாகும் என தகவல்கள் தெரிவிக்கின்றன.
படத்தின் படப்பிடிப்பு மற்றும் நடிகர்கள் உள்ளிட்ட கூடுதல் தகவல்கள் விரைவில் வெளியாகும் என்று எதிர்பார்க்கப்படுகிறது.