சுயாதீன இசை (Indie Music) உலகில் புதிய வரலாற்றுச் சாதனையைப் படைத்து, ரசிகர்களிடையே பெரும் வரவேற்பைப் பெற்று வருகிறது "பவழமல்லி" பாடல். ஸ்ருதி ஹாசன் மற்றும் சாய் அபயங்கர் இணைந்து பாடியுள்ள இந்தப் பாடல், இணையதளங்களில் 7 கோடி (70 Million) பார்வைகளைக் கடந்து உலகளவில் வைரலாகியுள்ளது. கவிஞர் விவேக்கின் வரிகளில், இனிமையான மெலடி, புதுமையான இசைக்கோர்ப்பு மற்றும் கண்கவர் காட்சியமைப்பால் இந்தப் பாடல் அனைத்துத் தரப்பு ரசிகர்களையும் வெகுவாகக் கவர்ந்துள்ளது.
இன்டி இசையில் இருந்து சினிமாவுக்கு
இசையமைப்பாளர் சாய் அபயங்கர், தனது தனித்துவமான ஆல்பங்கள் மூலம் ஒட்டுமொத்த இசை ரசிகர்களின் கவனத்தையும் ஈர்த்தவர். முன்னதாக இவரது இசையில் வெளியான "கட்சி சேரா", "ஆசை கூட" போன்ற ஆல்பங்கள் பட்டிதொட்டியெங்கும் ஹிட் அடித்த நிலையில், தற்போது திரைப்பட இசை உலகிலும் இவருக்கு வாய்ப்புகள் குவிகின்றன. இவரது இசையில் வெளியான முதல் திரைப்படமான "டியூட்" (Dude) நல்ல வரவேற்பைப் பெற்றதைத் தொடர்ந்து, தற்போது தமிழ் சினிமாவின் முன்னணி நட்சத்திரங்களின் படங்களுக்கு ஒப்பந்தமாகி வருகிறார். குறிப்பாக இயக்குநர் அட்லீ தயாரிக்கும் படம், விஜய் சேதுபதி மற்றும் தனுஷ் நடிக்கும் திரைப்படங்கள் எனப் பெரிய புராஜெக்ட்களில் சாய் அபயங்கர் கமிட் ஆகியுள்ளார்.
சமூக வலைதளங்களை ஆக்கிரமித்த 'பவழமல்லி'
சாய் அபயங்கரின் ஐந்தாவது இசை ஆல்பமான "பவழமல்லி", வெளியான சில நாட்களிலேயே தென்னிந்திய சமூக வலைதளங்களில் ட்ரெண்டிங்கில் முதலிடம் பிடித்தது. குறிப்பாக இன்ஸ்டாகிராம் ரீல்ஸ்களில் லட்சக்கணக்கானோர் இந்தப் பாடலைப் பயன்படுத்தி வருகின்றனர். புதுமையான இசை மொழி மற்றும் தனித்துவமான மெலடிகள் மூலம், தமிழ் இசை உலகில் அதிவேகமாக வளர்ந்து வரும் இசையமைப்பாளராகச் சாய் அபயங்கர் உருவெடுத்துள்ளார். "பவழமல்லி" பாடலின் இந்த மாபெரும் வெற்றி, புதிய தலைமுறை இசையமைப்பாளர்களுக்குக் கிடைத்துள்ள அங்கீகாரமாகப் பார்க்கப்படுகிறது.