தமிழகத்தில் சமீபகாலமாகப் பெருகிவரும் போதை கலாச்சாரம் மற்றும் அதன் விளைவாக அரங்கேறும் கொலை, கொள்ளை போன்ற சமூகக் குற்றங்கள் அன்றாடச் செய்திகளாக மாறிவிட்டன. இத்தகைய அவலங்களைக் கண்டு வருந்துவதோடு நின்றுவிடாமல், மாணவர்களைத் தவறான பாதையிலிருந்து மீட்க ஒரு ஆக்கப்பூர்வமான முயற்சியை எடுக்க வேண்டும் என்ற நோக்கத்தில் 'முதற்கனல்' திரைப்படம் உருவாக்கப்பட்டுள்ளது. ஸ்ரீ கெங்கா புரொடக்ஷன்ஸ் சார்பில் ஆர். போத்திராஜ் DFT தயாரித்துள்ள இத்திரைப்படம், இன்றைய இளைய தலைமுறையினரின் எதிர்காலத்தைக் கேள்விக்குறியாக்கும் போதைப் பழக்கத்திற்கு எதிரான ஒரு முக்கியப் பதிவாக இருக்கும்.
வன்முறை இல்லாத விழிப்புணர்வு
பொதுவாகப் போதைப்பொருள் பின்னணியில் வெளியாகும் திரைப்படங்கள் வன்முறை நிறைந்ததாகக் காட்சிப்படுத்தப்படும். ஆனால், பள்ளி மற்றும் கல்லூரி மாணவர்கள் அனைவரும் தடையின்றிப் பார்த்து விழிப்புணர்வு பெற வேண்டும் என்பதற்காக, எந்தவித வன்முறை காட்சிகளும் இல்லாமல் இப்படத்தைத் தயாரிப்பாளர் உருவாக்கியுள்ளார். குறிப்பாக, பள்ளி மாணவர்களை மையமாக வைத்து, அவர்களின் வாழ்வைச் 'சிந்தடிக்' போதைப் பொருட்கள் எவ்வாறு சீரழிக்கின்றன என்பதையும், அந்தப் பேராபத்திலிருந்து மீள்வதற்கான வழிமுறைகளையும் இத்திரைப்படம் விரிவாகப் பேசுகிறது.
தொழில்நுட்பக் குழு
முன்னதாக 'அப்பா வேணாம்பா' மற்றும் 'அதையும் தாண்டி புனிதமானது' ஆகிய திரைப்படங்களை இயக்கிய அனுபவம் வாய்ந்த இயக்குநர் ஆர். வெங்கட்டராமன் இப்படத்தை இயக்கியுள்ளார். அனுபவம் வாய்ந்த தொழில்நுட்பக் கலைஞர்களான கந்தசாமி கோபால் ஒளிப்பதிவையும், மீராலால் இசையமைப்பையும் கையாண்டுள்ளனர். டிஸ்யன் சாரதி படத்தொகுப்புப் பணிகளைச் செய்துள்ள நிலையில், கவிஞர் மருதபரணி, மோகன் மற்றும் ஆத்தூர் பெரியசாமி ஆகியோர் பாடல்களை எழுதியுள்ளனர். ஆர். நட்ராஜ் இணை தயாரிப்பாளராகவும், D. ராஜேந்திரன் தயாரிப்பு மேற்பார்வையாளராகவும் பணியாற்றியுள்ளனர். சமூக நோக்கில் உருவாகியுள்ள இத்திரைப்படம் வரும் மே மாதம் திரையரங்குகளில் வெளியாக உள்ளது.