தமிழக சட்டமன்றத் தேர்தல் முடிவுகள் வரும் திங்கட்கிழமை வெளியாகவுள்ள நிலையில், இசைஞானி இளையராஜா தனது அதிகாரப்பூர்வ யூடியூப் தளத்தில் பகிர்ந்துள்ள ஒரு வீடியோ சமூக வலைதளங்களில் பெரும் விவாதத்தை ஏற்படுத்தியுள்ளது.
விஜய் புகைப்படத்துடன் இளையராஜாவின் பதிவு
திரையுலகின் இரு துருவங்களாகப் பார்க்கப்படும் விஜய் குறித்து இளையராஜா பகிர்ந்த வீடியோ அரசியல் வட்டாரத்தில் உற்று நோக்கப்படுகிறது. இளையராஜா பகிர்ந்துள்ள அந்த வீடியோவில், தமிழக வெற்றிக் கழகத்தின் தலைவரும், நடிகருமான விஜய்யின் புகைப்படத்துடன் 1988-ஆம் ஆண்டு வெளியான ”இது எங்கள் நீதி" திரைப்படத்தில் இடம்பெற்ற புகழ்பெற்ற பாடலான "சின்னத்தம்பி உன்னை நம்பி காத்திருக்கு இந்த நாடு..." என்ற பாடல் பகிர்ந்துள்ளார்.
பாடலின் முக்கியத்துவம்
இந்த பாடல் வரிகள் ஒரு தலைவனை நோக்கி மக்கள் வைக்கும் நம்பிக்கையைப் பிரதிபலிப்பதாக அமைந்திருக்கிறது. ”சின்னத்தம்பி உன்னை நம்பி காத்திருக்கு இந்த நாடு...உன் கையில் இருக்குது ஒரு கூடு!” என்ற வரிகள், தற்போது முதல் முறையாகத் தேர்தல் களத்தைச் சந்தித்துள்ள விஜய்க்குப் பொருந்துவது போல் அமைந்துள்ளதாக விஜய் ரசிகர்கள் உற்சாகமடைந்துள்ளனர்.
அரசியல் ரீதியான பார்வை
திங்கட்கிழமை தேர்தல் முடிவுகள் வெளியாகவுள்ள நிலையில், இளையராஜா இந்த வீடியோவைப் பகிர்ந்துள்ளது தற்செயலானதா அல்லது ஒரு மறைமுக ஆதரவா என்ற கேள்வி எழுந்துள்ளது. ஒரு மூத்த கலைஞராக, இளையராஜா அரசியலில் அடியெடுத்து வைத்துள்ள விஜய்க்கு தனது வாழ்த்துகளை இசை வழியாகத் தெரிவிக்கிறாரா? என்றும் "காத்திருக்கு இந்த நாடு" என்ற வரிகள் மூலம், தமிழக அரசியலில் மாற்றத்தை எதிர்பார்க்கும் மக்களின் மனநிலையை அவர் பிரதிபலிக்கிறாரா? என்றும் கேள்வி எழுந்துள்ளது.
ரசிகர்களின் வரவேற்பு
இந்த வீடியோ வெளியான சில நிமிடங்களிலேயே லட்சக்கணக்கான பார்வைகளைக் கடந்து வைரலாகி வருகிறது. விஜய் ரசிகர்கள் இதனை ஒரு பெரிய அங்கீகாரமாகக் கருதி "தளபதி - இசைஞானி" கூட்டணியை ட்ரெண்ட் செய்து வருகின்றனர்.
தேர்தல் களம் ஏற்கனவே அனல் பறக்கும் நிலையில், இளையராஜாவின் இந்தத் திடீர் வீடியோ பதிவு தமிழக அரசியலில் ஒரு புதிய திருப்பத்தை ஏற்படுத்தியுள்ளது. திங்கட்கிழமை வெளியாகும் முடிவுகள், இந்த "சின்னத்தம்பி"க்கு மக்கள் அளித்த தீர்ப்பைத் தெளிவாகக் காட்டும்.