'அறம்' படத்தின் மூலம் தமிழ் சினிமாவில் மிகச்சிறந்த தாக்கத்தை ஏற்படுத்திய இயக்குநர் கோபி நயினார், தனது அடுத்த படைப்பான 'காலனி' திரைப்படத்துடன் களமிறங்கியுள்ளார். இப்படத்தின் அதிகாரப்பூர்வ ஃபர்ஸ்ட் லுக் போஸ்டர் தற்போது வெளியாகி ரசிகர்களிடையே வரவேற்பைப் பெற்றுள்ளது.
இந்தத் திரைப்படத்தில் மூத்த நடிகை ராதிகா சரத்குமார் முதன்மை கதாபாத்திரத்தில் நடிக்கிறார். அவருடன் அஞ்சலி நாயர் மற்றும் எம். எஸ். பாஸ்கர் உள்ளிட்டோர் முக்கிய வேடங்களில் நடித்துள்ளனர். குறிப்பாக, 'தேன் இசைத் தென்றல்' தேவா நீண்ட இடைவேளைக்குப் பிறகு இப்படத்திற்கு இசையமைக்கிறார் என்பது குறிப்பிடத்தக்கது.
இயக்குநர் கோபி நயினார், 'கத்தி' படத்தின் கதை விவகாரம் மூலம் அறியப்பட்டு, பின்னர் நயன்தாரா நடித்த 'அறம்' படத்தின் மூலம் முக்கியமான இயக்குநராகத் தன்னை நிலைநிறுத்திக் கொண்டார். அதனைத் தொடர்ந்து 'கருப்பு நகரம்' என்ற முயற்சியைக் கைவிட்ட அவர், வெற்றிமாறன் தயாரிப்பில் ஆண்ட்ரியா நடித்த 'மனுஷி' திரைப்படத்தை இயக்கினார். அரசியல் மற்றும் பெண்ணியக் கருத்துகளைப் பேசும் அந்தத் திரைப்படம், தணிக்கை வாரியப் சிக்கல்கள் காரணமாக இன்னும் வெளியாகாமல் உள்ளது.
தற்போது 'அதிதி மூவிஸ்' நிறுவனம் தயாரித்துள்ள 'காலனி' படத்தின் ஃபர்ஸ்ட் லுக் போஸ்டரை இயக்குநர் வெற்றிமாறன் வெளியிட்டார். மேலும், இப்படத்தின் மோஷன் வீடியோவை நடிகர் விஜய் சேதுபதி தனது சமூக வலைதள பக்கத்தில் வெளியிட்டு படக்குழுவினருக்கு வாழ்த்து தெரிவித்துள்ளார்.