கர்ணன்' படத்திற்குப் பிறகு இயக்குனர் மாரி செல்வராஜுடன் தனுஷ் மீண்டும் கூட்டணி அமைக்கும் புதிய படத்தின் படப்பிடிப்பு வரும் செப்டம்பர் மாதம் தொடங்கவிருப்பதாக இயக்குனர் மாரி செல்வராஜ் அதிகாரப்பூர்வமாக அறிவித்துள்ளார். வேல்ஸ் நிறுவனம் தயாரிப்பில் ஏ.ஆர்.ரஹ்மான் இசையமைக்கும் இந்தப் படம் குறித்த அறிவிப்பு ரசிகர்களிடையே பெரும் எதிர்பார்ப்பை ஏற்படுத்தியுள்ளது. தற்போது முதற்கட்ட பணிகள் விறுவிறுப்பாக நடைபெற்று வருகின்றன.
படத்தின் கதைக்கரு என்ன?
படத்தின் மையக்கரு குறித்து விவரித்த மாரி செல்வராஜ், "எனது முந்தைய படங்கள் உருவாவதற்கான அடிப்படைக் காரணத்தை, அதன் வேரை கண்டுபிடித்து அதை முழுமையாக அழிக்க முயன்றால் என்ன நடக்கும்?" என்பதே தனுஷ் படத்தின் கதையாக இருக்கும் என்று தெரிவித்துள்ளார். மேலும், இது முழுக்க முழுக்க ஃபேன்டஸி, வரலாறு மற்றும் அரசியல் கலந்த அதிரடித் திரைப்படமாக இருக்கும் எனவும் அவர் குறிப்பிட்டுள்ளார்.
தனுஷின் புதிய இலக்கு
தனுஷ் இந்தப் படம் குறித்து பேசும்போது, இருவரின் திரைப்பயணத்திலும் இது ஒரு மைல்கல் படமாக இருக்க வேண்டும் என்று கூறியதாகவும், அதற்கேற்ப மிகப்பெரிய உழைப்பை அளித்து வருவதாகவும் மாரி செல்வராஜ் பத்திரிகையாளர் சந்திப்பில் தெரிவித்தார். தற்போது ராஜ்குமார் பெரியசாமி இயக்கத்தில் நடித்து வரும் படத்தை முடித்துவிட்டு, தனுஷ் மாரி செல்வராஜ் படப்பிடிப்பில் கலந்துகொள்வார் எனத் தெரிகிறது.