சமீபத்தில் வெளியாகி இளைஞர்களிடையே வரவேற்பைப் பெற்று வரும் 'வித் லவ்' திரைப்படத்தின் வெற்றியைத் தொடர்ந்து, அதன் படக்குழுவினர் சூப்பர் ஸ்டார் ரஜினிகாந்தை நேரில் சந்தித்து வாழ்த்துப் பெற்றனர். இந்த சந்திப்பின்போது ரஜினிகாந்த் தன்னை வெகுவாகப் பாராட்டியதாக நடிகை அனஸ்வரா ராஜன் தனது சமூக வலைதளப் பக்கத்தில் மகிழ்ச்சியுடன் தெரிவித்துள்ளார். ரஜினிகாந்தை சந்தித்த அந்த தருணம் குறித்துப் பகிர்ந்த அவர், தன்னை பார்த்ததும் "எங்கு இருந்தாய் இவ்வளவு நாள்?" என ரஜினி கேட்ட கேள்வி, தமக்கு மிகுந்த மனநிறைவைத் தந்ததாக நெகிழ்ச்சியுடன் குறிப்பிட்டுள்ளார்.
அபிஷன் ஜீவிந்த் - அனஸ்வரா கூட்டணியில் உருவான பள்ளிப்பருவக் காதல்
இயக்குநர் மதன் இயக்கத்தில், சௌந்தரா ரஜினிகாந்த் தயாரிப்பில் உருவான 'வித் லவ்' திரைப்படம், பள்ளிப்பருவக் காதலை மையமாக வைத்து பிப்ரவரி 6, 2026 அன்று திரைக்கு வந்தது. 'டூரிஸ்ட் பேமிலி' படத்தின் மூலம் இயக்குநராக அறிமுகமான அபிஷன் ஜீவிந்த், இப்படத்தில் கதாநாயகனாகத் தனது இரண்டாவது இன்னிங்ஸைத் தொடங்கியுள்ளார். அவருக்கு ஜோடியாக நடித்த அனஸ்வரா ராஜன், இப்படத்தின் மூலமே தமிழில் முழுநேர கதாநாயகியாகத் தடம் பதித்துள்ளார். முன்னதாக 'ராங்கி' போன்ற படங்களில் நடித்திருந்தாலும், 'வித் லவ்' அவருக்குத் தமிழ் ரசிகர்களிடையே பெரும் அடையாளத்தைப் பெற்றுத் தந்துள்ளது.
அடுத்தடுத்த வாய்ப்புகளும் 7ஜி ரெயின்போ காலனி 2 எதிர்பார்ப்பும்
தமிழில் 'வித் லவ்' மற்றும் தெலுங்கில் 'சாம்பியன்' எனத் தென்னிந்திய அளவில் பிஸியாகி வரும் அனஸ்வரா ராஜன், அடுத்ததாக இயக்குநர் செல்வராகவனின் இயக்கத்தில் உருவாகும் '7ஜி ரெயின்போ காலனி 2' திரைப்படத்தில் நடித்து வருகிறார். இப்படத்தின் படப்பிடிப்பு தற்போது இறுதிக்கட்டத்தை எட்டியுள்ள சூழலில், இவ்வாண்டு இறுதிக்குள் இது திரைக்கு வரும் என எதிர்பார்க்கப்படுகிறது. ரஜினிகாந்தின் பாராட்டு மற்றும் 'வித் லவ்' படத்தின் வெற்றி அனஸ்வராவின் சினிமா பயணத்தில் ஒரு முக்கிய மைல்கல்லாக அமைந்துள்ளது.