உலகநாயகன் கமல்ஹாசனின் ராஜ் கமல் பிலிம்ஸ் இன்டர்நேஷனல் தயாரிப்பில், கடந்த 2024-ம் ஆண்டு வெளியாகி வசூல் வேட்டை நடத்திய 'அமரன்' திரைப்படம், தற்போது விருதுகளையும் வேட்டையாடி வருகிறது. மறைந்த ராணுவ வீரர் மேஜர் முகுந்த் வரதராஜனின் வீரக்கதையை மையமாக வைத்து ராஜ்குமார் பெரியசாமி இயக்கிய இப்படம், சமீபத்தில் கேரளாவில் நடைபெற்ற 70-வது ஃபிலிம் ஃபேர் விருது வழங்கும் விழாவில் மொத்தம் 8 விருதுகளை வென்று ஒட்டுமொத்த தென்னிந்திய திரையுலகையும் வியப்பில் ஆழ்த்தியுள்ளது.
தமிழ் சினிமாவின் ஆதிக்கம்!
சுமார் 350 கோடி ரூபாய்க்கும் மேல் வசூலித்து சாதனை படைத்த இப்படம், விமர்சன ரீதியாகவும் பெரும் அங்கீகாரத்தைப் பெற்றுள்ளது. இந்த ஆண்டுக்கான ஃபிலிம் ஃபேர் விருதுகளில், சிறந்த தமிழ் படமாக 'அமரன்' தேர்வு செய்யப்பட்டது. மேஜர் முகுந்த் வரதராஜனாக வாழ்ந்து காட்டிய சிவகார்த்திகேயனுக்குச் சிறந்த நடிகருக்கான விருதும், இந்து ரெபேக்கா வர்கீஸாக அனைவரையும் உருக வைத்த சாய் பல்லவிக்குச் சிறந்த நடிகைக்கான விருதும் வழங்கப்பட்டது. மேலும் இப்படத்தின் வெற்றிக்கு முக்கியக் காரணமாக இருந்த இயக்குநர் ராஜ்குமார் பெரியசாமிக்குச் சிறந்த இயக்குநருக்கான விருது வழங்கிக் கௌரவிக்கப்பட்டது.
இசை மற்றும் தொழில்நுட்பக் கலைஞர்களின் சங்கமம்!
இசைத்துறையிலும் அமரன் படத்தின் ஆதிக்கம் தொடர்ந்தது. ஜி.வி. பிரகாஷ் குமாருக்குச் சிறந்த இசை ஆல்பத்திற்கான விருது கிடைத்தது. குறிப்பாக, ரசிகர்களின் ஃபேவரைட் பாடலான 'ஹே மின்னலே' பாடலுக்காக ஹரிச்சரன் சிறந்த ஆண் பாடகராகவும், சுவேதா மோகன் சிறந்த பெண் பாடகியாகவும் தேர்ந்தெடுக்கப்பட்டனர். இது தவிர, படத்தின் தத்ரூபமான காட்சிகளுக்காக ஒளிப்பதிவாளர் சாய்க்குச் சிறந்த சினிமோட்டோகிராஃபர் விருதும் கிடைத்தது.
ஒரே படத்திற்கு 8 விருதுகள்
இந்த 70-வது ஃபிலிம் ஃபேர் விழாவில், ஒரே திரைப்படம் எட்டு முக்கியப் பிரிவுகளில் விருதுகளைக் குவிப்பது இதுவே முதல்முறை என்று கோலிவுட் வட்டாரங்கள் தெரிவிக்கின்றன. தயாரிப்பாளர் கமல்ஹாசன் முதல் படக்குழுவினர் வரை அனைவரும் இந்த வெற்றியை நெகிழ்ச்சியுடன் கொண்டாடி வருகின்றனர். தற்போது சமூக வலைதளங்களில் 'அமரன்' படத்தின் இந்தச் சாதனை குறித்த தகவல்கள் ரசிகர்களிடையே பெரும் உற்சாகத்தை ஏற்படுத்தியுள்ளது.