திரையுலகில் பெரும் எதிர்பார்ப்பை ஏற்படுத்தியுள்ள நடிகர் அஜித்தின் கார் பந்தயம் குறித்த திரைப்படம் பற்றி புதிய தகவல்கள் வெளியாகியுள்ளன. இயக்குநர் விஜய் இயக்கத்தில் உருவாகும் இப்படம் வெறும் ஆவணப்படம் என்று பேசப்பட்டு வந்த நிலையில், இது ஒன்றரை மணி நேரம் ஓடக்கூடிய ஒரு முழுமையான திரைப்படம் என்பதை இயக்குநர் உறுதிப்படுத்தியுள்ளார். அஜித்தின் கார் ரேஸ் ஆர்வத்தை மையமாகக் கொண்டு உருவாகும் இந்தப் படத்திற்கு ஜி.வி.பிரகாஷ் இசையமைக்கிறார்.
அஜித்துடனான நீண்டகாலப் பயணம்
நேற்று ஒரு தனியார் கல்லூரி விழாவில் சிறப்பு விருந்தினராகப் பங்கேற்ற இசையமைப்பாளர் ஜி.வி.பிரகாஷ், அஜித் குறித்து மனம் திறந்து பேசினார். "அஜித் சார் ஒரு மிகச்சிறந்த மனிதர். எனது ஆரம்பகாலத்தில் 'வெயில்' படத்திற்குப் பிறகு, 'கிரீடம்' போன்ற ஒரு பெரிய படத்தில் எனக்கு வாய்ப்பளித்து ஊக்கப்படுத்தியவர் அவர்தான். அதன் தொடர்ச்சியாக 'குட் பேட் அக்லி' படத்திலும் அவருடன் பணியாற்றினேன்.
இப்போது அவரது கார் ரேஸ் தொடர்பான பிரத்யேகப் படத்திற்கும் இசையமைப்பது எனக்குப் பெருமையாக இருக்கிறது," என்று அவர் தெரிவித்தார்.