தமிழ் திரையுலகின் உச்ச நட்சத்திரமான விஜய், முழுநேர அரசியல் பணிகளில் ஈடுபட உள்ளதால், அவர் நடிப்பில் உருவாகியுள்ள 'ஜனநாயகன்' திரைப்படத்தின் மீது மிகப்பெரிய எதிர்பார்ப்பு நிலவி வருகிறது. முன்னதாக, 2026-ம் ஆண்டு பொங்கல் பண்டிகையை முன்னிட்டு ஜனவரி 9-ம் தேதி இப்படம் வெளியாகும் என அறிவிக்கப்பட்டிருந்தது. ஆனால், தணிக்கை குழுவின் (Sensor) சில சிக்கல்கள் காரணமாக திட்டமிட்டபடி படம் திரையரங்குகளுக்கு வரவில்லை. இதனால் அப்டேட் கேட்டு காத்திருந்த ரசிகர்களுக்கு நீண்ட இடைவெளிக்குப் பிறகு தற்போது ஒரு முக்கியத் தகவல் கிடைத்துள்ளது.
சென்சார் சிக்கலும் புதிய திட்டமும்
தணிக்கை சான்றிதழ் தொடர்பாக தொடரப்பட்ட வழக்குகள் தள்ளிப்போன நிலையில், படக்குழு அந்த வழக்கை வாபஸ் பெற்றுவிட்டு தற்போது 'ரிவைசிங் கமிட்டி'க்கு (Revising Committee) படத்தை அனுப்பியுள்ளது. இந்த குழுவினர் இன்னும் படத்தைப் பார்த்து முடிக்காததால், படத்தின் வெளியீடு ஜூன் மாதத்திற்கு மாற்றப்பட்டுள்ளது. குறிப்பாக, ஜூன் மாதம் நடிகர் விஜய்யின் பிறந்தநாள் வருவதால், அந்த வாரத்தையே ரிலீஸிற்கு உகந்த நேரமாக படக்குழு கருதுவதாகத் தெரிகிறது.
பிறந்தநாள் ஸ்பெஷலாக ஜூன் ரிலீஸ்?
தற்போதைய நிலவரப்படி, ஜூன் 18, 19 அல்லது ஜூன் 25, 26 ஆகிய தேதிகளில் ஏதேனும் ஒரு நாளில் 'ஜனநாயகன்' திரைக்கு வர அதிக வாய்ப்புள்ளதாக இணையத்தில் தகவல்கள் கசிந்துள்ளன. எச். வினோத் இயக்கத்தில், அனிருத் இசையில் உருவாகியுள்ள இப்படத்தில் பாபி தியோல், பூஜா ஹெக்டே, மமிதா பைஜூ எனப் பெரிய நட்சத்திர பட்டாளமே இணைந்துள்ளது. விஜய்யின் திரையுலகப் பயணத்தின் கடைசிப் படம் என்பதால், ஜூன் மாத வெளியீடு அவரது ரசிகர்களுக்கு இரட்டிப்பு மகிழ்ச்சியைத் தரும் என எதிர்பார்க்கப்படுகிறது.