தமிழக வெற்றிக் கழகம், திமுக எனப் பல்வேறு கட்சிகளுடன் பேச்சுவார்த்தையில் இருப்பதாகக் கூறப்பட்ட நிலையில், நாம் தமிழர் கட்சியின் முன்னாள் முன்னணி நிர்வாகியான காளியம்மாள் இன்று (மார்ச் 13) அதிகாரப்பூர்வமாக அதிமுகவில் இணைந்தார். சென்னையில் உள்ள அதிமுக பொதுச்செயலாளர் எடப்பாடி பழனிசாமியின் இல்லத்தில் அவரை நேரில் சந்தித்து, பூங்கொத்து கொடுத்து தனது ஆதரவை வெளிப்படுத்தினார். அதிரடிப் பேச்சாளராகவும், கடல்சார் மக்களின் உரிமைகளுக்காகப் போராடும் சமூகச் செயல்பாட்டாளராகவும் அறியப்படும் காளியம்மாளுக்கு, அதிமுகவில் கொள்கை பரப்புச் செயலாளர் போன்ற முக்கியப் பொறுப்பும், வரும் சட்டப்பேரவைத் தேர்தலில் போட்டியிட வாய்ப்பும் வழங்கப்படலாம் என அரசியல் வட்டாரங்களில் பலமாக எதிர்பார்க்கப்படுகிறது.
கட்சியில் இணைந்த பின் செய்தியாளர்களைச் சந்தித்த காளியம்மாள், தான் அதிமுகவைத் தேர்ந்தெடுத்ததற்கான காரணத்தை உருக்கமாக விளக்கினார். ஒரு சாதாரண விவசாயக் குடும்பத்தில் இருந்து வந்து, இன்று ஒரு மாபெரும் இயக்கத்தை வழிநடத்தி வரும் எடப்பாடி பழனிசாமியின் ஆளுமையை ஏற்றுக்கொண்டு, ஒரு தமிழனின் தலைமையில் இயங்க வேண்டும் என்ற நோக்கத்திலேயே தான் இந்த முடிவை எடுத்ததாக அவர் தெரிவித்தார். முன்னதாக, கடந்த 2019 மக்களவைத் தேர்தலில் வட சென்னையில் போட்டியிட்டு சுமார் 60,000 வாக்குகளைப் பெற்று அனைவரின் கவனத்தையும் ஈர்த்த இவர், கடந்த பிப்ரவரி மாதம் நாம் தமிழர் கட்சியிலிருந்து விலகியிருந்தது குறிப்பிடத்தக்கது. கடலோர மாவட்ட மீனவப் பெண்களின் உரிமைகளுக்காகத் தொடர்ச்சியாகக் குரல் கொடுத்து வரும் இவரது வருகை, அதிமுகவின் வாக்கு வங்கியை, குறிப்பாக மகளிர் மத்தியில் பலப்படுத்தும் என்று கருதப்படுகிறது.