இந்தியாவில் நிதிப் பரிவர்த்தனைகளுக்கு மிக முக்கியமான ஆவணமாகத் திகழும் பான் கார்டு பெறுவதற்கான விதிமுறைகளை மத்திய அரசு கடுமையாக்கியுள்ளது. இதுவரை பான் கார்டு விண்ணப்பிக்க ஆதார் அட்டை மட்டுமே போதுமானதாக இருந்த நிலையில், வரும் 2026 ஏப்ரல் 1-ம் தேதி முதல் பிறந்த தேதியை உறுதிப்படுத்தும் கூடுதல் ஆவணத்தைச் சமர்ப்பிப்பது கட்டாயமாக்கப்பட்டுள்ளது. மார்ச் 31-ம் தேதி வரை விண்ணப்பிப்போருக்குப் பழைய நடைமுறைப்படி ஆதார் மட்டுமே போதுமானது என்று மத்திய பொதுச் சேவை அமைப்பு தெரிவித்துள்ளது.
தேவையான கூடுதல் ஆவணங்கள்
புதிய விதிகளின்படி, ஏப்ரல் 1 முதல் விண்ணப்பிப்பவர்கள் பிறந்த தேதிக்கான ஆதாரமாகப் பிறப்புச் சான்றிதழ், வாக்காளர் அடையாள அட்டை, பாஸ்போர்ட், ஓட்டுநர் உரிமம் அல்லது பத்தாம் வகுப்பு மதிப்பெண் சான்றிதழ் ஆகியவற்றில் ஏதேனும் ஒன்றை அவசியம் இணைக்க வேண்டும். இதன் மூலம் விண்ணப்பதாரர்களின் தனிப்பட்ட தகவல்கள் இன்னும் துல்லியமாக உறுதி செய்யப்படும் என எதிர்பார்க்கப்படுகிறது.
பான் கார்டின் அத்தியாவசியத் தேவை
வங்கி கணக்குகள் தொடங்கவும், 50,000 ரூபாய்க்கு மேல் டெபாசிட் செய்யவும் அல்லது பணம் எடுக்கவும் பான் கார்டு மிக அவசியமாகும். மேலும், வருமான வரி தாக்கல் செய்தல், நிலம் மற்றும் வீடு போன்ற சொத்துக்களை வாங்குதல் போன்ற முக்கிய நிதிச் செயல்பாடுகளுக்கு இது ஆதாரமான அடையாள ஆவணமாகத் திகழ்கிறது. அரசின் இந்த புதிய மாற்றத்தினால், இனி வரும் காலங்களில் பான் கார்டு விண்ணப்பிக்கும் போது மக்கள் கூடுதல் கவனத்துடன் செயல்பட வேண்டியுள்ளது.