ஈரானுடன் அமைதிப் பேச்சுவார்த்தை தோல்வி அடைந்தால் ஹார்முஸ் ஜலசந்தியை தாக்க அமெரிக்கா முடிவு

அமெரிக்கா மற்றும் ஈரான் நாடுகளுக்கு இடையே நீடித்து வரும் மோதல் போக்கால், உலக நாடுகளின் வர்த்தக முக்கியத்துவம் வாய்ந்த ஹார்முஸ் ஜலசந்தி பகுதியில் போர் மேகங்கள் சூழ்ந்துள்ளன. பேச்சுவார்த்தையில் சுமுக முடிவு எட்டப்படாவிட்டால், ஈரானிய இலக்குகள் மீது பெரும் தாக்குதலை முன்னெடுக்க அமெரிக்க ராணுவம் தயாராகி வருகிறது.

போர் நிறுத்த நிலவரமும் ட்ரம்ப்பின் எச்சரிக்கையும்

கடந்த பிப்ரவரி 28 முதல் இரு நாடுகளுக்கும் இடையே நடைபெற்று வந்த போர், மார்ச் 8 முதல் தற்காலிகமாக நிறுத்தப்பட்டது. இரண்டு வார கால போர் நிறுத்தம் கடந்த 23-ம் தேதியுடன் முடிவடைந்த நிலையில், அதன் காலத்தை எல்லையற்ற முறையில் நீட்டிப்பதாக அமெரிக்க அதிபர் டொனால்டு ட்ரம்ப் அறிவித்தார். எனினும், ஹார்முஸ் ஜலசந்தி பகுதியை ஈரான் ராணுவம் மூடியுள்ளதால் அங்கு அமெரிக்க போர்க்கப்பல்கள் அணிவகுத்துள்ளன. "நேரம் கடந்து கொண்டிருக்கிறது, ஈரான் விரைந்து செயல்பட வேண்டும்" என தனது சமூக வலைதளப் பக்கத்தில் அதிபர் ட்ரம்ப் காட்டமான எச்சரிக்கையைப் பதிவு செய்துள்ளார்.

ஈரான் உச்ச தலைவரின் பதிலடி

அமெரிக்காவின் அழுத்தங்களுக்கு ஈரானின் உச்ச தலைவர் மோஜ் தபா காமேனி கடும் எதிர்ப்பு தெரிவித்துள்ளார். ஈரான் மக்களின் ஒற்றுமை எதிரிகளின் கூட்டணியில் பிளவை ஏற்படுத்தியுள்ளதாகக் குறிப்பிட்ட அவர், தேசப்பற்றாளர்களின் மன உறுதியைக் குலைக்க எதிரி நாடுகள் எடுக்கும் முயற்சி ஒருபோதும் பலிக்காது எனத் தனது அறிக்கையில் கூறியுள்ளார். இதற்கிடையில், இரு நாடுகளுக்கும் இடையே நிலவும் போர்ப் பதற்றத்தைத் தணிக்க பாகிஸ்தான், துருக்கி மற்றும் எகிப்து போன்ற நாடுகள் சமரச முயற்சிகளில் தீவிரமாக ஈடுபட்டு வருகின்றன.

ராணுவ ரீதியான முன்னேற்பாடுகள்

சீனாவிலிருந்து ஈரானுக்கு வரும் ஆயுத விநியோகத்தைத் தடுக்க ஹார்முஸ் ஜலசந்தியை அமெரிக்கா முழுமையாக முடக்கியுள்ளதாக ராணுவ வட்டாரங்கள் தெரிவிக்கின்றன. ஈரானின் சரக்குக் கப்பல்களைத் தொடர்ந்து கைப்பற்றுவதன் மூலம் அந்நாட்டுக்கு பொருளாதார மற்றும் ராணுவ ரீதியான நெருக்கடியை ஏற்படுத்த அமெரிக்கா முயல்கிறது. ஒருவேளை பேச்சுவார்த்தை தோல்வியுற்றால், மத்திய கிழக்கில் முகாமிட்டுள்ள 19 போர்க்கப்பல்கள் மற்றும் 300-க்கும் மேற்பட்ட போர் விமானங்கள் மூலம் மிகப் பெரிய தாக்குதல் நடத்தப்படும் என அமெரிக்கா அறிவித்துள்ளது. மேலும், கடலில் ஈரான் வீசியுள்ள கண்ணிவெடிகளை அகற்றி வருவதாகவும், தொடர்ந்து கண்ணிவெடி வீசும் படகுகளைச் சுட்டு வீழ்த்த அதிபர் உத்தரவிட்டுள்ளதாகவும் தகவல்கள் வெளியாகியுள்ளன.