அமெரிக்காவின் சியாட்டில் நகரில், இந்தியாவின் மாபெரும் ஆன்மீகத் தலைவரான சுவாமி விவேகானந்தரை கௌரவிக்கும் வகையில் அவரது முழு உருவ வெண்கலச் சிலை நிறுவப்பட்டு, கோலாகலமாகத் திறந்து வைக்கப்பட்டது. அமெரிக்காவில் ஒரு மாநகராட்சி நிர்வாகத்தின் முழுமையான ஆதரவுடன் நிறுவப்பட்ட முதல் முழு உருவ விவேகானந்தர் சிலை இது என்பது குறிப்பிடத்தக்கது. சியாட்டில் நகரின் மேயர் கேட்டி வில்சன் மற்றும் இந்தியத் தூதர் பிரகாஷ் குப்தா ஆகியோர் இணைந்து இச்சிலையைத் திறந்து வைத்தனர்.
இந்தியாவின் கலாச்சாரப் பரிசு
இந்த அழகிய வெண்கலச் சிலையை இந்தியச் சிற்பக் கலைஞர் நரேஷ் குமார் குமாவத் வடிவமைத்துள்ளார். இந்திய கலாச்சார உறவுகளுக்கான கவுன்சில் (ICCR), இச்சிலையைச் சியாட்டில் நகரத்திற்குப் பரிசாக வழங்கியுள்ளது. சியாட்டில் நகரின் இதயப் பகுதியாகக் கருதப்படும் 'வெஸ்ட்லேக் சதுக்கத்தில்' (Westlake Square) இச்சிலை கம்பீரமாக நிறுவப்பட்டுள்ளது.
முக்கியத்துவம் வாய்ந்த இடம்
அமேசான் நிறுவனத்தின் தலைமையகம் மற்றும் முக்கிய மாநாட்டு மையங்களுக்கு மிக அருகில் இந்தச் சிலை அமைந்துள்ளதால், தினமும் ஆயிரக்கணக்கான மக்கள் இதைக் கடந்து செல்கின்றனர். அமெரிக்க மண்ணில் இந்திய ஆன்மீகத் தத்துவங்களைப் பறைசாற்றும் வகையில், மக்கள் அதிகம் கூடும் இந்தப் பகுதியில் சிலை நிறுவப்பட்டுள்ளது பொதுமக்கள் மற்றும் இந்திய வம்சாவளியினர் மத்தியில் பெரும் வரவேற்பைப் பெற்றுள்ளது.