ஈரான் உச்ச தலைவர் அயத்துல்லா அலி காமேனி அமெரிக்கா மற்றும் இஸ்ரேல் கூட்டுப் படைகளால் படுகொலை செய்யப்பட்ட விவகாரத்தில், இந்திய அரசு அமைதி காப்பது நடுநிலையானது அல்ல என்று காங்கிரஸ் மூத்த தலைவர் சோனியா காந்தி தெரிவித்துள்ளார். ஆங்கில நாளிதழ் ஒன்றில் இது குறித்து அவர் எழுதியுள்ள கட்டுரையில், சர்வதேச விதிகள் மீறப்பட்டு ஒரு நாட்டின் தலைவர் கொல்லப்பட்ட நிலையில், இந்தியா போன்ற ஒரு பெரிய ஜனநாயக நாடு மவுனம் காப்பது தனது பொறுப்பைத் துறப்பதற்குச் சமம் என்று சாடியுள்ளார். ஈரானின் இறையாண்மை சிதைக்கப்பட்டதை இந்தியா கண்டிக்கத் தவறியது நமது வெளியுறவுக் கொள்கையின் நம்பகத்தன்மையையே கேள்விக்குறியாக்குவதாக அவர் குறிப்பிட்டுள்ளார்.
பிரதமர் மோடியின் ஒருதலைப்பட்சமான அணுகுமுறை
அமெரிக்காவும் இஸ்ரேலும் இணைந்து நடத்திய தொடர் தாக்குதல்களைப் பற்றிப் பேசாத பிரதமர் நரேந்திர மோடி, ஈரான் நடத்திய பதிலடித் தாக்குதலை மட்டும் கண்டிப்பது ஒருதலைப்பட்சமானது என்று சோனியா காந்தி விமர்சித்துள்ளார். இந்தப் படுகொலை நடப்பதற்கு வெறும் 48 மணி நேரத்திற்கு முன்பு பிரதமர் மோடி இஸ்ரேல் சென்று பெஞ்சமின் நெதன்யாகு அரசுக்குத் தனது ஆதரவை உறுதிப்படுத்தியதை அவர் சுட்டிக்காட்டியுள்ளார். பேச்சுவார்த்தை மூலம் தீர்வு காண வேண்டும் எனப் பொதுவான கருத்துகளைக் கூறுவது சர்வதேச நெறிமுறைகள் சீரழிவதற்கே வழிவகுக்கும் என்றும், இந்தியாவின் இத்தகைய போக்கு படுகொலைக்கு மறைமுக ஒப்புதல் அளிப்பது போல் தோன்றுவதாகவும் அவர் கவலை தெரிவித்துள்ளார்.
வரலாற்று உறவுகளும் இந்தியச் சிந்தனையும்
முன்னாள் பிரதமர் வாஜ்பாய் காலத்தில் ஈரானுடன் இருந்த ஆழமான மற்றும் வரலாற்று ரீதியான உறவுகளைத் தற்போதைய அரசு மறந்துவிட்டதாகச் சோனியா காந்தி வருத்தம் தெரிவித்துள்ளார். 'வசுதைவ குடும்பகம்' (“உலகமே ஒரு குடும்பம்”) என்கிற உயரிய சிந்தனை வெறும் விழாக்கால முழக்கமாக மட்டும் இருக்கக் கூடாது என்றும், அது நீதி மற்றும் சர்வதேசச் சட்டங்களைக் காப்பதற்கான அர்ப்பணிப்பாக இருக்க வேண்டும் என்றும் அவர் வலியுறுத்தியுள்ளார். திட்டமிட்ட இந்தப் படுகொலையைக் காங்கிரஸ் கட்சி வன்மையாகக் கண்டிப்பதாகவும், மத்திய அரசு தனது தெளிவான நிலைப்பாட்டை சர்வதேச அரங்கில் பதிவு செய்ய வேண்டும் என்றும் அவர் அந்தக் கட்டுரையில் கோரியுள்ளார்.