"இந்திய எல்லையை நாமும் ஆக்கிரமித்துள்ளோம்" - நேபாள பிரதமர் பாலன் ஷாவின் பேச்சால் நாடாளுமன்றத்தில் கடும் கொந்தளிப்பு!

இந்திய எல்லைப் பகுதிகளை நேபாளம் ஆக்கிரமித்துள்ளதாக நேபாளப் பிரதமர் பாலன் ஷா நாடாளுமன்றத்தில் பேசியிருப்பது, அந்த நாட்டில் கடுமையான அரசியல் புயலையும் விவாதங்களையும் கிளப்பியுள்ளது. இந்தியாவின் ஆக்கிரமிப்பு குறித்து காத்மாண்டு தொடர்ந்து புகார் கூறி வரும் நிலையில், பிரதமரின் இந்த ஒப்புதல் வாக்குமூலம் அதிர்ச்சியை ஏற்படுத்தியுள்ளது.

நாடாளுமன்றத்தில் வெடித்த புதிய சர்ச்சை

நேபாளத்தின் மிக இளம் வயதான 35 வயது பிரதமர் பாலன் ஷா, அந்நாட்டு நாடாளுமன்றக் கூட்டத்தொடரில் முதன்முறையாக உரையாற்றினார். அப்போது அவர் பேசுகையில், "நான் பிரதமரான பிறகுதான் சமீபத்தில் ஒரு உண்மையை அறிந்துகொண்டேன், அது உங்களுக்கும் வியப்பைத் தரும். இந்தியா மட்டும் நேபாள எல்லையை ஆக்கிரமிக்கவில்லை; நேபாளமும் பல இடங்களில் இந்திய எல்லைக்குள் ஊடுருவி ஆக்கிரமித்துள்ளது. இப்போது இரு நாடுகளும் உண்மைகளை ஆராய்ந்து, நண்பர்களாக ஒன்றாக அமர்ந்து இந்த எல்லைப் பிரச்சினையைத் தீர்க்க வேண்டும்" என்று குறிப்பிட்டார்.

எல்லைப் பகுதிகள் எவை?

நேபாள பிரதமரின் இந்த பேச்சு அந்நாட்டில் பெரும் பரபரப்பை ஏற்படுத்திய நிலையில், நேபாளம் இந்தியாவின் எந்தெந்த பகுதிகளை ஆக்கிரமித்துள்ளது என்ற எந்தவொரு குறிப்பிட்ட விபரத்தையும் அவர் நாடாளுமன்றத்தில் வெளியிடவில்லை. இருப்பினும், லிபுலேக், லிம்பியதுரா மற்றும் காலாபானி ஆகிய எல்லைப் பகுதிகளில் நிலவும் சிக்கல்கள் இருதரப்பு உறவுகளில் தொடர்ந்து முள் போல நீடிப்பதை அவர் ஒப்புக்கொண்டார். மேலும், வரலாற்று அறிஞர்கள், நில அளவையாளர்கள் மற்றும் நிபுணர்களின் உதவியுடன் இதற்குத் தீர்வு காண வேண்டும் என்றும், இது தொடர்பாக சீனா மற்றும் பிரிட்டன் (UK) ஆகிய நாடுகளுடனும் நேபாள எம்.பி.க்கள் பேசியுள்ளனர் என்றும் அவர் கூறினார்.

எதிர்க்கட்சிகள் மற்றும் தூதர்களின் கடும் எதிர்ப்பு

பிரதமரின் இந்த பேச்சுக்கு நேபாளத்தின் எதிர்க்கட்சிகள் கடும் எதிர்ப்பு தெரிவித்து, இப்பேச்சை நாடாளுமன்றக் குறிப்பிலிருந்து நீக்க வேண்டும் என வலியுறுத்தியுள்ளனர். நேபாள காங்கிரஸ் கட்சியின் பாசனா தாப்பா, கம்யூனிஸ்ட் கட்சியின் ரமேஷ் மல்லா ஆகியோர், "பிரதமர் தனது பேச்சுக்கு ஆதாரத்தை சமர்ப்பிக்க வேண்டும் அல்லது அதனைத் திரும்பப் பெற வேண்டும்" என முழங்கினர். இந்தியாவுக்கான முன்னாள் நேபாள தூதர் நிலாம்பர ஆச்சார்யா கூறுகையில், "இந்தியாவுக்குள் நேபாள அரசு ஆக்கிரமிப்பு செய்ததாக எந்தப் பதிவும் இல்லை; எல்லைத் தூண்கள் இல்லாததால் சில இடங்களில் மக்கள் மாறிப் பயன்படுத்துகிறார்களே தவிர அரசு ஆக்கிரமிக்கவில்லை" என்றார். மற்றொரு முன்னாள் தூதரான தீப் குமார் உபத்யாயாவும், "இந்தியா கூட இப்படி ஒரு குற்றச்சாட்டை இதுவரை அதிகாரப்பூர்வமாக வைத்ததே இல்லை" என அதிருப்தி வெளியிட்டார்.

நேபாள வெளியுறவுத்துறை கொடுத்த அவசர விளக்கம்

பிரதமரின் பேச்சால் சர்ச்சை வெடித்ததை அடுத்து, நேபாள அரசு உடனடியாகப் சேதக் கட்டுப்பாட்டு (Damage Control) நடவடிக்கையில் இறங்கியது. இதுகுறித்து நேபாள வெளியுறவு அமைச்சகம் வெளியிட்டுள்ள விளக்கத்தில், "பிரதமர் குறிப்பிட்டது இரு நாடுகளின் எல்லைகளுக்கு இடைப்பட்ட 'நோ-மேன்ஸ் லேண்ட்' (No-man's land) எனப்படும் ஆள் நடமாட்டமில்லாத பகுதியில் நடக்கும் எல்லை தாண்டிய ஆக்கிரமிப்பைக் குறித்துத்தான். நதி எல்லைக் கொள்கையின்படி, சில இடங்களில் நேபாள குடிமக்கள் இந்தியப் பகுதியிலும், இந்தியக் குடிமக்கள் நேபாளப் பகுதியிலும் விவசாயம் அல்லது குடியிருப்புகளைப் பயன்படுத்தி வருகின்றனர். மற்றபடி லிபுலேக், காலாபானி விவகாரத்தில் நேபாளத்தின் அதிகாரப்பூர்வ நிலையில் எந்த மாற்றமும் இல்லை" என்று சமாதானம் கூறியுள்ளது.

இந்தியாவின் தற்போதைய நிலைப்பாடு என்ன?

பிரதமர் பாலன் ஷாவின் இந்தப் பேச்சுக்கு இந்தியத் தரப்பிலிருந்து உடனடியாக எந்தப் பதிலும் வரவில்லை. ஆனால், லிபுலேக் கணவாய் வழியாக இந்தியா நடத்தும் கைலாஷ் மானசரோவர் யாத்திரைக்கு நேபாளம் எதிர்ப்பு தெரிவித்தபோது, அதனை இந்தியா ஏற்கனவே நிராகரித்திருந்தது. சர்ச்சைக்குரிய பகுதிகள் அனைத்தும் உத்தரகாண்ட் மாநிலத்தின் ஒரு பகுதி என்றும், இந்த எல்லைப் பிரச்சினைகளை இருதரப்பு தூதரகப் பேச்சுவார்த்தைகள் மூலம் மட்டுமே தீர்க்க முடியும் என்றும் இந்தியா தொடர்ந்து தனது உறுதியான நிலைப்பாட்டைக் காத்து வருகிறது.

Follow us on our official WhatsApp channel for breaking news alerts and updates!