நேபாள நாட்டின் உள்துறை அமைச்சராக இருந்த சுதான் குருங், நிதி முறைகேடு தொடர்பான குற்றச்சாட்டுகள் எழுந்த நிலையில் இன்று தனது பதவியை ராஜினாமா செய்துள்ளார். கடந்த மார்ச் 27-ம் தேதி அமைச்சராகப் பொறுப்பேற்ற இவர், சர்ச்சைக்குரிய தொழிலதிபர் ஒருவருடன் ரகசிய வணிகத் தொடர்புகள் மற்றும் பங்குப் பரிவர்த்தனைகளில் ஈடுபட்டதாகப் புகார்கள் எழுந்தன. இந்த விவகாரம் அரசியல் வட்டாரத்தில் பெரும் விமர்சனங்களை உருவாக்கிய நிலையில், தன் மீதான குற்றச்சாட்டுகள் குறித்து எவ்விதத் தலையீடும் இன்றி நேர்மையான விசாரணை நடைபெற வழிவகுக்கும் வகையில் அவர் இந்தப் பதவி விலகல் முடிவை எடுத்துள்ளார்.
அறநெறி குறித்த விளக்கம்
தனது ராஜினாமா குறித்து சமூக வலைதளத்தில் கருத்து தெரிவித்துள்ள சுதான் குருங், அதிகாரத்தை விட அறநெறி மற்றும் மக்களின் நம்பிக்கையே முக்கியமானது என்று குறிப்பிட்டுள்ளார். நாட்டில் வெளிப்படைத்தன்மையையும் நல்லாட்சியையும் எதிர்பார்க்கும் இன்றைய இளைய தலைமுறையினரின் குரலுக்கு மதிப்பளித்தே இந்த முடிவை எடுத்ததாக அவர் கூறியுள்ளார். பொது வாழ்க்கை தூய்மையாக இருக்க வேண்டும் என்பதை வலியுறுத்திய அவர், தியாகங்களால் உருவான அரசாங்கத்தின் மாண்பைக் காக்க அறநெறி சார்ந்த பதிலடியே அவசியம் எனத் தெரிவித்தார். இவரின் ராஜினாமாவைத் தொடர்ந்து, உள்துறை அமைச்சகத்தின் கூடுதல் பொறுப்பை அந்நாட்டுப் பிரதமர் பாலன் ஷா ஏற்றுக்கொண்டுள்ளார்.