கடந்த 2014-ஆம் ஆண்டு மார்ச் 8-ஆம் தேதி மலேசியத் தலைநகர் கோலாலம்பூரிலிருந்து சீனாவிற்கு 239 பேருடன் புறப்பட்டு, நடுவானில் மர்மமான முறையில் காணாமல் போன மலேசிய ஏர்லைன்ஸ் MH-370 விமானத்தைத் தேடும் பணிகளைத் தொடர வேண்டும் எனப் பயணிகளின் குடும்பத்தினர் மலேசிய அரசுக்கு உருக்கமான வேண்டுகோள் விடுத்துள்ளனர். இந்த விமானம் மாயமாகி இன்றுடன் 12 ஆண்டுகள் நிறைவடைந்துள்ள நிலையில், பயணிகளின் உறவினர்கள் ஒன்றிணைந்து உருவாக்கியுள்ள ‘வாய்ஸ் 370’ என்ற குழு, அமெரிக்காவின் ‘ஓசியன் இன்ஃபினிட்டி’ நிறுவனத்துடனான தேடுதல் ஒப்பந்தத்தை நீட்டிக்க வலியுறுத்தியுள்ளது. வரும் ஜூன் மாதத்துடன் இந்த ஒப்பந்தம் முடிவுக்கு வரவுள்ள நிலையில், 'விமானம் கிடைத்தால் மட்டுமே கட்டணம்' (No Find, No Fee) என்ற தற்போதைய நடைமுறையைப் பின்பற்றித் தேடுதல் வேட்டையைத் தீவிரப்படுத்த வேண்டும் என்று அவர்கள் கோரிக்கை விடுத்துள்ளனர்.
உலகின் மிகப்பெரிய மர்மங்களில் ஒன்றாகக் கருதப்படும் இந்த விமானம் குறித்துப் பல்வேறு ஆய்வுகள் நடத்தப்பட்ட போதிலும், அது கடலில் விழுந்ததா அல்லது நிலப்பரப்பில் நொறுங்கியதா என்பது இன்றுவரை விடை தெரியாத கேள்வியாகவே உள்ளது. கருப்புப் பெட்டியிலிருந்து எந்த சமிக்ஞையும் கிடைக்காதது தேடுதல் பணியில் பெரும் பின்னடைவை ஏற்படுத்தியது. 2016-ஆம் ஆண்டு இந்தியப் பெருங்கடல் பகுதியில் சில இறக்கை பாகங்கள் கண்டெடுக்கப்பட்ட நிலையில், விமானம் அங்கேயே விழுந்திருக்கலாம் எனக் கருதப்பட்டது. இருப்பினும் ஆஸ்திரேலியா, மலேசியா மற்றும் சீனா உள்ளிட்ட நாடுகள் ஒருங்கிணைந்து நடத்திய தீவிரத் தேடுதலில் எந்த முன்னேற்றமும் ஏற்படவில்லை. 12 ஆண்டுகளாகத் தங்கள் உறவுகளின் நிலை என்னவென்று தெரியாமல் தவித்து வரும் குடும்பத்தினரின் இந்த நியாயமான கோரிக்கை மலேசிய மக்களிடையே பெரும் சோகத்தையும் விவாதத்தையும் ஏற்படுத்தியுள்ளது.