இன்று வெள்ளிக்கிழமை தொழுகையை முடித்த பிறகு செய்தியாளர்களிடம் பேசிய பிரதமர் அன்வர், இந்த முன்முயற்சிக்கு பெற்றோர்கள் முழு ஒத்துழைப்பு அளிக்க வேண்டும் என்று கேட்டுக்கொண்டார். பிள்ளைகளிடம் பணிவையும், நற்பண்புகளையும் வளர்க்க இது ஒரு சிறந்த வழியாகும் என்று அவர் குறிப்பிட்டார். இந்தத் திட்டம் குறித்து சமூக வலைதளங்களில் ஆதரவும் எதிர்ப்பும் கலந்து விவாதிக்கப்பட்டு வரும் நிலையில் அவர் இந்த விளக்கத்தைத் தந்துள்ளார்.
அந்தஸ்து பார்க்காமல் பொறுப்பேற்றல்
“எந்த ஒரு மாணவனும் விதிவிலக்கல்ல; யாரும் வசதியான பின்னணியில் இருந்து வந்தவர்கள் என்று ஒதுங்கி நிற்க முடியாது. ஒவ்வொருவருக்கும் கடமை இருக்கிறது. நாம் ஒரு கழிவறையைப் பயன்படுத்தினால், அதைச் சுத்தம் செய்யும் பொறுப்பும் நமக்கு உண்டு” என்று அன்வார் திட்டவட்டமாகக் கூறினார். கழிவறைகளைச் சுத்தம் செய்வது என்பது துப்புரவுப் பணியாளர்களுக்கு மட்டுமேயான இழிவான வேலை கிடையாது என்பதை மாணவர்கள் உணர்ந்துகொள்ள வேண்டும் என்று அவர் வலியுறுத்தினார்.
எதிர்மறை எண்ணங்களுக்கு முற்றுப்புள்ளி
இந்தத் திட்டத்தை இழிவாகப் பார்ப்பது ஒரு தவறான மனப்பான்மை என்று சாடிய பிரதமர், இது மாணவர்களின் கல்வியோடு அவர்களின் தனிமனித ஒழுக்கத்தையும் மேம்படுத்தும் என்று நம்புவதாகத் தெரிவித்தார். இளைஞர்கள் தங்களது சூழலைத் தூய்மையாக வைத்திருப்பதை ஒரு கௌரவமான செயலாகக் கருத வேண்டும் என்பதே தனது நோக்கம் என்றும் அவர் சுட்டிக்காட்டினார்.