மலேசியா மற்றும் இந்தியா ஆகிய இரு நாடுகளின் பரஸ்பர நன்மை, பிராந்தியப் பொருளாதார வளர்ச்சி, மற்றும் இருநாட்டு மக்களின் உள்ளடக்கிய, நிலையான எதிர்காலத்திற்காக இந்தியாவுடனான தனது வியூகக் கூட்டுறவை மேலும் விரிவுபடுத்த மலேசியா முழு அர்ப்பணிப்புடன் இருப்பதாகத் தெரிவித்துள்ளது.
இந்தியத் தூதருக்கு பிரியாவிடை
மலேசியாவிற்கான இந்திய உயர் ஆணையர் பி.என்.ரெட்டி, அந்நாட்டில் தனது தூதரகப் பணியை நிறைவு செய்ய உள்ளதைத் தொடர்ந்து, மலேசிய மனிதவளத்துறை அமைச்சர் டத்தோ ஸ்ரீ ஆர். ரமணன் அவர்களைப் மரியாதை நிமித்தமாக நேரில் சந்தித்துப் பிரியாவிடை பெற்றார். இந்தச் சந்திப்பின் போது இந்தியத் தூதரின் சிறப்பான பணிகளுக்கு அமைச்சர் ரமணன் தனது மனமார்ந்த பாராட்டுகளையும் நன்றியையும் தெரிவித்துக் கொண்டார்.
நட்புணர்வை வலுப்படுத்திய இந்தியத் தூதர்
இதுகுறித்து தனது ஃபேஸ்புக் பக்கத்தில் பதிவிட்டுள்ள மலேசிய அமைச்சர் ரமணன், "இந்திய உயர் ஆணையர் பி.என்.ரெட்டி அவர்கள் மலேசியாவில் பணியாற்றிய காலம் முழுவதும், மலேசியா மற்றும் இந்தியா இடையிலான நட்புணர்வையும் வியூகக் கூட்டுறவையும் வலுப்படுத்துவதில் ஆற்றிய முக்கியப் பங்கிற்கும், காட்டிய அர்ப்பணிப்பிற்கும் எனது ஆழ்ந்த நன்றியைத் தெரிவித்துக் கொள்கிறேன்" என்று குறிப்பிட்டுள்ளார்.
எதிர்கால ஒத்துழைப்பு குறித்து ஆலோசனைக் கூட்டம்
மேலும், இந்தச் சந்திப்பு குறித்து விவரித்த அவர், "இருநாடுகளுக்கு இடையேயான எதிர்கால ஒத்துழைப்பு மற்றும் வளர்ச்சிப் பணிகள் குறித்துப் பல்வேறு கருத்துக்களைப் பரிமாறிக் கொள்ள இந்தச் சந்திப்பு ஒரு நல்ல வாய்ப்பாக அமைந்தது. மலேசியாவும் இந்தியாவும் விரிவான வியூகப் பங்காளிகளாக (Comprehensive Strategic Partners) இருக்கும் தகுதிக்கேற்ப இருதரப்பு உறவுகளும் தொடர்ந்து வலுவடைந்து வருகின்றன" என்று பெருமிதத்துடன் தெரிவித்துள்ளார்.
பரஸ்பர மரியாதையும் நம்பிக்கையும்
இந்திய உயர் ஆணையர் பி.என்.ரெட்டி தனது பணிக்காலத்தில் இரு நாடுகளுக்கு இடையேயான இருதரப்பு ஒத்துழைப்பை மேம்படுத்தியது மட்டுமின்றி, இந்தியா - மலேசியா இடையே பரஸ்பர மரியாதை மற்றும் ஆழமான நம்பிக்கையின் அடிப்படையிலான ஒரு வலுவான உறவை உருவாக்குவதில் மிக முக்கியப் பங்காற்றியுள்ளார் என்றும் மலேசிய மனிதவளத்துறை அமைச்சர் ஆர். ரமணன் பாராட்டியுள்ளார்.