மத்திய கிழக்கு நாடுகளில் அமெரிக்கா மற்றும் இஸ்ரேல் படைகளுக்கும் ஈரானுக்கும் இடையிலான போர் இன்று ஏழாவது நாளை எட்டியுள்ள நிலையில், சூழல் மிகவும் மோசமடைந்துள்ளது. கடந்த பிப்ரவரி 28 அன்று ஈரானின் உச்ச தலைவர் அயதுல்லா அலி காமேனி உள்ளிட்ட 50 முக்கிய அதிகாரிகள் வான்வழித் தாக்குதலில் கொல்லப்பட்டதைத் தொடர்ந்து, ஈரான் தனது பதிலடியைத் தீவிரப்படுத்தியுள்ளது. இதுவரை ஈரானில் மட்டும் 1,230 பேர் உயிரிழந்துள்ள நிலையில், நேற்று அதிகாலை இஸ்ரேல் மீது நடத்தப்பட்ட ஏவுகணைத் தாக்குதலால் லட்சக்கணக்கான மக்கள் நிலத்தடிப் புகலிடங்களில் தஞ்சமடைந்துள்ளனர். இந்த இக்கட்டான சூழலில், ஈரானின் மிக உயரிய மதப் பதவியில் உள்ள மூத்த ஷியா மதகுரு அயதுல்லா அப்துல்லா ஜவாதி அமோலி, ஈரான் அரசு தொலைக்காட்சியில் தோன்றி அமெரிக்க அதிபர் டொனால்டு ட்ரம்பைக் கொல்ல வேண்டும் என பகிரங்கமாக அழைப்பு விடுத்துள்ளார். அடக்குமுறை செய்யும் அமெரிக்காவையும் இஸ்ரேலையும் வீழ்த்த ட்ரம்ப் மற்றும் இஸ்ரேலியர்களின் ரத்தம் சிந்தப்பட வேண்டும் என அவர் ஆவேசமாகப் பேசியிருப்பது உலக அரங்கில் பெரும் அதிர்ச்சியை ஏற்படுத்தியுள்ளது.
இதற்கிடையில், ஈரானுக்கு எதிரான வான்வழித் தாக்குதல்களை நிறுத்துவதற்கு அமெரிக்க செனட் சபையில் கொண்டு வரப்பட்ட தீர்மானம் 53-47 என்ற வாக்குக் கணக்கில் தோல்வியடைந்தது. இதன் விளைவாக, ஈரானுக்கு எதிராகத் தனது ராணுவ நடவடிக்கைகளைத் தொடர்ந்து முன்னெடுக்க அதிபர் டொனால்டு ட்ரம்பிற்கு முழுமையான அதிகாரம் கிடைத்துள்ளது. ஈரானிய மதகுருவின் இந்த வன்முறைத் தூண்டல் மற்றும் அமெரிக்காவின் பிடிவாதமான ராணுவ நிலைப்பாடு ஆகியவற்றால், இந்தப் போர் விரைவில் முடிவுக்கு வரும் என்பதற்கான அறிகுறிகள் தென்படவில்லை