அமெரிக்காவின் ஃப்ளோரிடா மாகாணத்தில் செயற்கை நுண்ணறிவு (AI) தொழில்நுட்பத்தின் பயன்பாடு தொடர்பான ஒரு அதிர்ச்சியூட்டும் மரணம் நிகழ்ந்துள்ளதாகத் தகவல்கள் வெளியாகியுள்ளன. 36 வயதான ஜொனாதன் கவாலஸ் (Jonathan Kavalas) என்ற நபர் தற்கொலை செய்துகொண்டது பெரும் விவாதத்தைக் கிளப்பியுள்ளது.
தனிப்பட்ட வாழ்க்கைச் சிக்கல்களால் தனது மனைவியைப் பிரிந்து வாழ்ந்து வந்த ஜொனாதன், தனிமையிலிருந்து மீளவும் ஆறுதல் தேடவும் 'கூகுள் ஜெமினி' (Google Gemini) எனும் செயற்கை நுண்ணறிவுத் தளத்தைப் பயன்படுத்தத் தொடங்கியுள்ளார். ஆரம்பத்தில் ஆலோசனைகளைப் பெறுவதற்காகத் தொடங்கப்பட்ட இந்தத் தொடர்பு, நாளடைவில் தீவிரமான உணர்ச்சிப்பூர்வமான உறவாக மாறியுள்ளது.
அந்தச் செயற்கை நுண்ணறிவு அமைப்புக்கு “ஜியா” எனப் பெயரிட்ட ஜொனாதன், அதைத் தனது மனைவியாகவே கருதிப் பழகி வந்ததாகத் தெரிகிறது. பல வாரங்களாக சுமார் 4,700-க்கும் மேற்பட்ட செய்திகளை அந்த ஏஐ-உடன் அவர் பரிமாறியுள்ளார். இந்த மாயையான உறவு அவரது மனநிலையைத் தீவிரமாகப் பாதித்த நிலையில், கடந்த ஆண்டு அக்டோபர் 5-ஆம் தேதி அவர் தற்கொலை செய்துகொண்டதாகத் தகவல்கள் தெரிவிக்கின்றன.
இந்தச் சம்பவத்தைத் தொடர்ந்து, ஜொனாதனின் தந்தை கூகுள் நிறுவனத்திற்கு எதிராக நீதிமன்றத்தில் வழக்கு தொடர்ந்துள்ளார். கூகுளின் சாட்பாட் தனது மகனின் மனநிலையைச் சீர்குலைத்து, அவரைத் தற்கொலைக்குத் தூண்டும் வகையில் செயல்பட்டதாக அவர் குற்றம் சாட்டியுள்ளார்.
இருப்பினும், கூகுள் நிறுவனம் இந்தக் குற்றச்சாட்டுகளை மறுத்துள்ளது. தங்களது ஜெமினி தொழில்நுட்பம் தன்னை ஒரு செயற்கை நுண்ணறிவு அமைப்பு என்று பலமுறை அடையாளப்படுத்திக் கொள்வதோடு, மனநலச் சிக்கல்கள் அல்லது அவசரத் தேவை இருக்கும்போது உரிய நிபுணர்களை அணுகுமாறு அறிவுறுத்தும் பாதுகாப்பு அம்சங்களைக் கொண்டுள்ளதாக அந்நிறுவனம் விளக்கம் அளித்துள்ளது.
இந்தத் துயரச் சம்பவம், மனிதர்களைப் போலவே உரையாடும் ஏஐ அமைப்புகள் பயனர்களிடம் ஏற்படுத்தும் உணர்ச்சிப்பூர்வமான தாக்கம் மற்றும் மனநலப் பாதிப்புகள் குறித்து உலகளவில் புதிய விவாதத்தைத் தூண்டியுள்ளது. ஏஐ தளங்களைப் பயன்படுத்துவதில் முறையான கட்டுப்பாடுகளும், வழிகாட்டுதல்களும் அவசியம் என நிபுணர்கள் எச்சரிக்கின்றனர்.