வளைகுடா போர் பதற்றம்: ஐக்கிய அரபு அமீரகத் துறைமுகத்தில் டிரோன் தாக்குதல் - இந்திய எண்ணெய் கப்பல் தப்பியது!
தாக்குதலில் இருந்து தப்பிய 'ஜக் லாட்கி'
ஐக்கிய அரபு அமீரகத்தின் (UAE) புஜைரா (Fujairah) துறைமுகத்தில் உள்ள எண்ணெய் முனையத்தின் மீது நடத்தப்பட்ட டிரோன் தாக்குதலில், அங்கிருந்த 'ஜக் லாட்கி' (Jag Laadki) என்ற இந்தியக் கப்பல் எவ்வித பாதிப்புமின்றி அதிர்ஷ்டவசமாகத் தப்பியுள்ளது. இந்தத் தாக்குதல் நடந்த சமயத்தில், அந்த இந்தியக் கப்பல் கச்சா எண்ணெயை ஏற்றிக்கொண்டிருந்தது. தற்போது 80,800 மெட்ரிக் டன் கச்சா எண்ணெயுடன் அந்தக் கப்பல் பாதுகாப்பாக இந்தியா நோக்கிப் பயணத்தைத் தொடங்கியுள்ளதாக மத்திய அரசு அறிவித்துள்ளது. கப்பலில் உள்ள அனைத்து இந்திய மாலுமிகளும் நலமாக உள்ளனர்.
தாயகம் திரும்பும் எல்பிஜி கப்பல்கள்
'ஜக் லாட்கி' தவிர, 'சிவாலிக்' மற்றும் 'நந்தா தேவி' ஆகிய இரண்டு இந்திய எல்பிஜி கப்பல்களும் சனிக்கிழமை ஹார்முஸ் ஜலசந்தியைத் தாண்டி இந்தியா நோக்கி வந்து கொண்டிருக்கின்றன. இவை சுமார் 92,712 மெட்ரிக் டன் எல்பிஜியைச் சுமந்து வருகின்றன. இந்த இரண்டு கப்பல்களும் முறையே மார்ச் 16 அன்று முந்திரா துறைமுகத்திற்கும், மார்ச் 17 அன்று கண்ட்லா துறைமுகத்திற்கும் வந்து சேரும் என எதிர்பார்க்கப்படுகிறது. வளைகுடா பகுதியில் தற்போது 22 இந்தியக் கப்பல்களும், அவற்றில் 611 மாலுமிகளும் உள்ளனர். அவர்களின் பாதுகாப்பை இந்தியக் கப்பல் போக்குவரத்து இயக்குநரகம் (DGS) தீவிரமாகக் கண்காணித்து வருகிறது.
அமீரகத் துறைமுகங்களுக்கு ஈரான் எச்சரிக்கை
அமெரிக்காவுடனான போர் பதற்றம் உச்சகட்டத்தை எட்டியுள்ள நிலையில், அமெரிக்காவுக்கு உதவும் ஜெபல் அலி, கலீபா மற்றும் புஜைரா ஆகிய மூன்று முக்கியத் துறைமுகங்கள் தங்களுக்கு "சட்டப்பூர்வமான இலக்குகள்" என்று ஈரான் அறிவித்துள்ளது. இந்த இடங்களை காலி செய்யுமாறு ஈரான் எச்சரித்த சில மணி நேரங்களிலேயே இந்தத் தாக்குதல் நடத்தப்பட்டுள்ளது. பிப்ரவரி 28 அன்று போர் தொடங்கியதில் இருந்து இதுவரை சுமார் 1,94,000 இந்தியர்கள் வளைகுடா நாடுகளிலிருந்து தாயகம் திரும்பியுள்ளனர். இந்திய தூதரகங்கள் அங்குள்ள குடிமக்களுக்கு விசா மற்றும் பயண உதவிகளைத் தொடர்ந்து வழங்கி வருகின்றன.