"போரால் அமைதி வராது!" - போப் ஆண்டவரின் அமைதி அழைப்பிற்கு தலாய் லாமா முழு ஆதரவு!

திபெத்திய ஆன்மீகத் தலைவர் தலாய் லாமா, மேற்கு ஆசியாவில் அதிகரித்து வரும் பதற்றங்களுக்கு மத்தியில் அமைதி நிலவக் கோரி போப் ஆண்டவர் 14-ஆம் லியோ விடுத்த அழைப்பிற்குத் தனது முழுமையான ஆதரவைத் தெரிவித்துள்ளார். இது குறித்து அவர் தனது எக்ஸ் (X) சமூக வலைத்தளப் பக்கத்தில் வெளியிட்டுள்ள செய்தியில், வன்முறை என்பது உலகளவில் கண்டிக்கத்தக்கது என்றும், அனைத்து மதங்களும் சகிப்புத்தன்மையையும் அமைதியையுமே போதிக்கின்றன என்றும் குறிப்பிட்டுள்ளார்.

தலாய் லாமாவின் செய்தி

"குருத்தோலை ஞாயிறு திருப்பலியின் போது, பரிசுத்த பிதா போப் லியோ விடுத்த வலிமையான அமைதி அழைப்பை நான் முழுமனதுடன் ஆதரிக்கிறேன். ஆயுதங்களைக் கீழே போட்டுவிட்டு வன்முறையைத் துறக்க வேண்டும் என்ற அவரது அழைப்பு என் மனதைத் தொட்டது. கிறித்துவம், புத்தம், இஸ்லாம், இந்து மதம், யூதம் என உலகின் எந்தப் பெரிய ஆன்மீக மரபுகளைப் பார்த்தாலும் அவற்றின் அடிப்படை செய்தி ஒன்றுதான்: அன்பு, கருணை, சகிப்புத்தன்மை மற்றும் சுயக்கட்டுப்பாடு. வன்முறைக்கு எந்த மத போதனைகளிலும் இடமில்லை. வன்முறை மீண்டும் வன்முறையையே ஈன்றெடுக்கும் என்பதை வரலாறு நமக்கு மீண்டும் மீண்டும் நிரூபித்துள்ளது," என்று அவர் உருக்கமாகத் தெரிவித்துள்ளார்.

பேச்சுவார்த்தையே தீர்வு

மத்திய கிழக்கு நாடுகள் அல்லது ரஷ்யா - உக்ரைன் இடையிலான மோதல்கள் எதுவாக இருந்தாலும், அவற்றுக்கான நிரந்தரத் தீர்வு என்பது பேச்சுவார்த்தை, ராஜதந்திரம் மற்றும் பரஸ்பர மரியாதையின் அடிப்படையில் மட்டுமே அமைய வேண்டும் என்று தலாய் லாமா வலியுறுத்தியுள்ளார். ஆழமான மட்டத்தில் நாம் அனைவரும் சகோதர சகோதரிகள் என்ற புரிதலுடன் அணுகினால் மட்டுமே வன்முறையை முடிவுக்குக் கொண்டு வர முடியும் என்றும் அவர் கூறியுள்ளார்.

வெள்ளை மாளிகை கருத்து

முன்னதாக, "போர் தொடுப்பவர்களின் பிரார்த்தனையை கடவுள் செவிமடுக்க மாட்டார்" எனப் போப் ஆண்டவர் குறிப்பிட்டிருந்தார். இது குறித்து அமெரிக்க வெள்ளை மாளிகையின் ஊடகச் செயலாளர் கரோலின் லீவிட் கூறுகையில், "சவாலான காலங்களில் தலைவர்கள் பிரார்த்தனைக்கு அழைப்பு விடுப்பதில் தவறில்லை. அமெரிக்கா யூத-கிறிஸ்தவ விழுமியங்களின் அடிப்படையில் உருவான நாடு. வரலாற்றின் இக்கட்டான காலங்களில் எமது தலைவர்களும் ராணுவமும் பிரார்த்தனையை நாடியுள்ளனர். நமது வீரர்களுக்காகவும், வெளிநாடுகளில் பணியாற்றுபவர்களுக்காகவும் பிரார்த்தனை செய்யுமாறு அதிபர் அழைப்பு விடுப்பது ஒரு உன்னதமான செயலாகும்," என்று தெரிவித்துள்ளார்.