மலேசியாவில் தந்தை கண்முன்னே நடந்த கொடூரம் - ஆற்றுக்குள் மகனை இழுத்துச் சென்ற முதலை!

மலேசியாவின் கினபடாங்கன் பகுதியில் உள்ள கம்பங் செகலியுட் (Kampung Segaliud) ஆற்றில், செவ்வாய்க்கிழமை (மார்ச் 17) இரவு ஒரு கோரமான சம்பவம் நிகழ்ந்துள்ளது. 28 வயதான முகமது ரையான் அப்துல்லா (Mohd Rayyan Abdullah) என்பவர் தனது தந்தையுடன் ஆற்றில் இறால் பிடிப்பதற்காக வலை வீசிக் கொண்டிருந்தார். அப்போது ஆற்றில் இருந்த ஒரு முதலை திடீரென ரையானைத் தாக்கி, அவரை நீருக்குள் இழுத்துச் சென்றது.

தனது மகன் முதலையிடம் சிக்கி இழுத்துச் செல்லப்படுவதைக் கண்டு அவரது தந்தை பெரும் அதிர்ச்சியில் உறைந்து போனார். இந்தச் சம்பவம் குறித்து இரவு 8:22 மணியளவில் தீயணைப்புத் துறைக்குத் தகவல் தெரிவிக்கப்பட்டது. கினபடாங்கன் தீயணைப்பு நிலையத் தலைவர் ஹைரி ஓது (Hairi Otuh) இதுகுறித்துக் கூறுகையில், மீட்புக் குழுவினர் இரவு 9:10 மணிக்குச் சம்பவ இடத்திற்கு வந்து தேடுதல் பணிகளைத் தொடங்கினர் என்று தெரிவித்தார்.

தேடுதல் பணி தீவிரம்

இன்று (மார்ச் 18) காலை வரை முகமது ரையான் கண்டுபிடிக்கப்படவில்லை. மீட்புக் குழுவினர் மற்றும் உள்ளூர் மக்கள் இணைந்து ஆற்றில் தீவிரமாகத் தேடி வருகின்றனர். தேடுதல் பணிகள் தொடர்ந்து நடைபெற்று வருவதாகப் பாதுகாப்புத் துறையினர் தெரிவித்துள்ளனர்.