அபுதாபி அரசு ஊழியர்களின் நலனை மேம்படுத்தும் வகையிலும், பணித்திறனை அதிகரிக்கும் வகையிலும் 15 வகையான விடுமுறைகளை உள்ளடக்கிய புதிய விரிவான வழிகாட்டுதல்களை அபுதாபி அரசு திறன் மேம்பாட்டுத் துறை (Government Enablement Department) வெளியிட்டுள்ளது. 2025-ஆம் ஆண்டின் 8-வது மனிதவளச் சட்டத்தின் கீழ் இந்த புதிய விதிமுறைகள் நடைமுறைக்கு வருகின்றன.
ஆண்டு விடுமுறை மற்றும் தகுதி வரம்புகள்
புதிய சட்டத்தின்படி, அரசு ஊழியர்கள் அவர்களது பணி நிலைக்கு (Grade) ஏற்ப ஆண்டுக்கு 22 முதல் 30 வேலை நாட்கள் வரை விடுமுறை பெறலாம். ஐந்தாவது நிலை மற்றும் அதற்கு மேல் உள்ள அதிகாரிகளுக்கு 30 நாட்களும், 6 மற்றும் 7-வது நிலையில் உள்ள ஊழியர்களுக்கு 22 நாட்களும் விடுமுறை அளிக்கப்படும். ஊழியர்கள் தங்களது தகுதிகாண் பருவத்தை (Probation) முடித்த பின்னரே இந்த விடுமுறையைப் பெற முடியும்.
விடுமுறை கோரி விண்ணப்பித்த 7 வேலை நாட்களுக்குள் அதிகாரிகள் பதிலளிக்கவில்லை எனில், அந்த விடுமுறை தானாகவே அங்கீகரிக்கப்பட்டதாகக் கருதப்படும். மேலும், 15 வேலை நாட்களுக்கு மேல் விடுமுறை எடுப்பவர்கள், தங்களது ஊதியத்தை முன்கூட்டியே பெற்றுக்கொள்ளவும் வழிவகை செய்யப்பட்டுள்ளது.
விடுமுறை மாற்றங்கள் மற்றும் இழப்பீடு
ஊழியர்கள் அந்தந்த ஆண்டிலேயே விடுமுறையைப் பயன்படுத்த வேண்டும். பயன்படுத்தப்படாத விடுமுறையில் பாதியை அடுத்த ஆண்டுக்கு மாற்றிக்கொள்ளலாம். உடல் ஊனமுற்ற ஊழியர்களுக்கு ஆண்டுதோறும் கூடுதலாக 5 நாட்கள் விடுமுறை வழங்கப்படும். அதேபோல், விடுமுறையைப் பயன்படுத்த முடியாத சூழலில், மேலதிகாரிகளின் பரிந்துரை மற்றும் பட்ஜெட் இருப்பைப் பொறுத்து, அதற்குரிய பண பலன்களைப் பெற்றுக்கொள்ளவும் சட்டத்தில் இடமுண்டு. பணி ஓய்வு பெறும்போது, பயன்படுத்தப்படாத விடுமுறை நாட்களுக்கு ஊழியரின் அடிப்படை ஊதிய அடிப்படையில் பணமாக இழப்பீடு வழங்கப்படும்.
இதர விடுமுறை பிரிவுகள்
புதிய விதிமுறைகளின் கீழ் பல்வேறு இதர விடுமுறைகளுக்கான கால அளவுகளும் நிர்ணயிக்கப்பட்டுள்ளன:
- மகப்பேறு விடுமுறை: 3 மாதங்கள்
- தத்தெடுப்பு விடுமுறை: 3 மாதங்கள்
- திருமண விடுமுறை: 10 நாட்கள்
- தந்தைக்கான விடுமுறை (Paternity): 6 நாட்கள்
- துக்க விடுமுறை: 10 நாட்கள்
- ஹஜ் பயணம்: 15 நாட்கள்
- இத்தா (Iddah) காலம்: 4 மாதங்கள் 10 நாட்கள்
- பணி தொடர்பான காயம்: 12 நாட்கள்
- தேர்வு விடுமுறை: அமீரகத்திற்குள் 3 நாட்கள், வெளிநாடுகளில் தேர்வுகள் எழுத 15 நாட்கள்.
மருத்துவ விடுமுறை மற்றும் முக்கிய விதிகள்
ஊழியர்கள் ஆண்டுக்கு 15 நாட்கள் வரை முழு ஊதியத்துடன் மருத்துவ விடுமுறை எடுக்கலாம். மருத்துவச் சான்றிதழ் இன்றி ஆண்டுக்கு 10 நாட்கள் வரை (ஒரு முறைக்கு 2 நாட்கள் மிகாமல்) விடுமுறை எடுக்க அனுமதி உண்டு. ஒருவேளை உடல்நலக் குறைவு 6 மாதங்களுக்கு மேல் நீடித்தால், ஊழியரின் பணித்திறனை ஆய்வு செய்ய மருத்துவக் குழுவிற்குப் பரிந்துரைக்கப்படும். மேலும், மருத்துவக் காரணங்களுக்காக பணி நேரத்தை நாளொன்றுக்கு 2 மணி நேரம் வரை குறைத்துக்கொள்ளவும் வாய்ப்பு அளிக்கப்பட்டுள்ளது.