தமிழக சட்டமன்றத் தேர்தலில் 108 இடங்களைக் கைப்பற்றி தனிப்பெரும் கட்சியாக உருவெடுத்துள்ள தமிழக வெற்றிக் கழகத்தின் தலைவர் விஜய், இன்று பிற்பகல் 3.30 மணி அளவில் சென்னை கிண்டியில் உள்ள ஆளுநர் மாளிகையில் ஆளுநர் ராஜேந்திர அர்லேகரைச் சந்தித்தார். இந்தச் சந்திப்பின் போது, செங்கோட்டையன், ஆனந்த், ஆதவ் அர்ஜுனா, நிர்மல்குமார் உள்ளிட்ட முக்கிய நிர்வாகிகள் விஜய்யுடன் சென்றிருந்தனர். ஆளுநர் அர்லேகர், விஜய்யைச் சால்வை அணிவித்து வரவேற்று வாழ்த்து தெரிவித்த நிலையில், அவரிடம் ஆட்சி அமைப்பதற்கான உரிமை கோரும் கடிதத்தை விஜய் சமர்ப்பித்தார். இதனைத் தொடர்ந்து, சென்னை நேரு உள்விளையாட்டு அரங்கில் நாளை காலை 11.30 மணியளவில் நடைபெறவுள்ள பிரம்மாண்ட விழாவில் தமிழக முதல்வராக விஜய் பதவியேற்க உள்ளார். அவருடன் அமைச்சரவையில் செங்கோட்டையன், ஜே.சி.டி. பிரபாகர், மரிய வில்சன், ராஜ்மோகன், சத்தியபாமா உள்ளிட்டோர் இடம்பெறக்கூடும் என எதிர்பார்க்கப்படுகிறது.
சட்டமன்றத்தில் பெரும்பான்மையை நிரூபிக்க 118 உறுப்பினர்கள் தேவை என்ற நிலையில், 108 இடங்களைப் பெற்றுள்ள தவெகவிற்கு காங்கிரஸ் தனது 5 உறுப்பினர்களின் ஆதரவை அதிகாரப்பூர்வமாக அறிவித்துள்ளது. வகுப்புவாத சக்திகளைத் தவிர்த்து, மதச்சார்பற்ற ஆட்சியை உறுதி செய்யும் நிபந்தனையோடு இந்த ஆதரவை வழங்குவதாகக் காங்கிரஸ் பொறுப்பாளர் கிரிஷ் சோடங்கர் தெரிவித்துள்ளார். இந்த ஆதரவை உறுதிப்படுத்தும் வகையில் காங்கிரஸ் கமிட்டித் தலைவர் செல்வப்பெருந்தகை உள்ளிட்டோர் விஜய்யைச் சந்தித்து வாழ்த்து கூறினர். அதே வேளையில், தலா 2 இடங்களை வைத்துள்ள சிபிஐ, சிபிஎம் மற்றும் விசிக ஆகிய கட்சிகள் தங்கள் கட்சிக்குள் ஆலோசித்து முடிவெடுக்க உள்ளதாகவும், 47 இடங்களை வைத்துள்ள அதிமுகவும் ஆதரவு அளிக்க வாய்ப்புள்ளதாகவும் அரசியல் வட்டாரங்கள் தெரிவிக்கின்றன.