தமிழக முதல்வர் விஜய் தலைமையிலான அமைச்சரவையில், விடுதலைச் சிறுத்தைகள் கட்சியின் வன்னியரசு மற்றும் இந்திய யூனியன் முஸ்லிம் லீக் கட்சியின் ஷாஜஹான் ஆகியோர் இன்று புதிய அமைச்சர்களாகப் பொறுப்பேற்றுக்கொண்டனர். அவர்களுக்கு ஆளுநர் ஆர்.வி.அர்லேகர் பதவிப் பிரமாணமும், ரகசியக் காப்புப் பிரமாணமும் செய்து வைத்தார். திண்டிவனம் தொகுதியில் வென்ற வன்னியரசுவுக்கு சமூகநீதித் துறையும், பாபநாசம் தொகுதியில் வென்ற ஷாஜஹானுக்கு சிறுபான்மை நலத்துறையும் இலாகாக்களாக ஒதுக்கப்பட்டுள்ளன. நேற்று மாலை தவெக அமைச்சரவையில் பங்கேற்பதாக இரு கட்சிகளும் அறிவித்ததைத் தொடர்ந்து இந்த பதவியேற்பு விழா இன்று நடைபெற்றது. ஆரம்பத்தில் வெளியில் இருந்து நிபந்தனையற்ற ஆதரவு தருவதாகக் கூறிய இவ்விரு கட்சிகளும், தற்போது ஆட்சியில் நேரடியாகப் பங்குகொண்டுள்ளன.
இரண்டாம் கட்ட அமைச்சரவை விரிவாக்கம்
இதற்கு முன்னதாக, மே 21-ஆம் தேதி நடைபெற்ற விழாவில் 23 எம்.எல்.ஏக்கள் அமைச்சர்களாகப் பதவியேற்றனர். ஸ்ரீநாத் (தூத்துக்குடி), கமலி.எஸ். (அவிநாசி), சி.விஜயலட்சுமி (குமாரபாளையம்), ஆர்.வி.ரஞ்சித்குமார் (காஞ்சிபுரம்), வினோத் (கும்பகோணம்), ராஜீவ் (திருவாடானை), பி.ராஜ்குமார் (கடலூர்), வி.காந்திராஜ் (அரக்கோணம்), மதன் ராஜா.பி (ஓட்டப்பிடாரம்), ஜெகதீஸ்வரி.கே (ராஜபாளையம்), ராஜேஷ்குமார்.எஸ் (கிள்ளியூர்), எம்.விஜய் பாலாஜி (ஈரோடு கிழக்கு), லோகேஷ் தமிழ்ச்செல்வன்.டி (ராசிபுரம்), விஜய் தமிழன் பார்த்திபன்.ஏ (சேலம் தெற்கு), ரமேஷ் (ஸ்ரீரங்கம்), பி.விஸ்வநாதன் (மேலூர்), குமார்.ஆர் (வேளச்சேரி), தென்னரசு.கே (பெரும்புதூர்), வி.சம்பத்குமார் (கோவை வடக்கு), முகமது பர்வேஸ் (அறந்தாங்கி), டி.சரத்குமார் (தாம்பரம்), என்.மரிய வில்சன் (ஆர்.கே.நகர்) மற்றும் விக்னேஷ்.கே (கிணத்துக்கடவு) ஆகியோருக்கு ஆளுநர் பதவிப் பிரமாணம் செய்து வைத்தார்.
கூட்டணி கட்சிகளின் பங்களிப்பும் இடதுசாரிகளின் அழுத்தமும்
தவெக தலைமையிலான தற்போதைய அமைச்சரவையில் காங்கிரஸ் கட்சிக்கு இரண்டும், விசிக மற்றும் ஐயூஎம்எல் ஆகிய கட்சிகளுக்கு தலா ஒரு அமைச்சர் பதவியும் வழங்கப்பட்டுள்ளது. குறிப்பாக, அதிமுகவில் இருந்து விலகி தவெகவுக்கு ஆதரவளித்த 25 எம்.எல்.ஏக்களுக்கு அமைச்சர் பதவி வழங்கக் கூடாது என்பதில் இடதுசாரிகளும், விசிகவும் உறுதியாக இருந்த நிலையில், இதுவரை அவர்களுக்கு அமைச்சரவையில் இடம் தரப்படவில்லை என்பது குறிப்பிடத்தக்கது.
ஆட்சி அமைத்த தவெக மற்றும் வரலாற்றுப் பின்னணி
கடந்த தமிழக சட்டப்பேரவை பொதுத் தேர்தலில் விஜய் தலைமையிலான தமிழக வெற்றி கழகம் 108 இடங்களைக் கைப்பற்றி தனிப்பெரும் கட்சியாக உருவெடுத்தது. ஆட்சி அமைக்கத் தேவையான 118 இடங்களை எட்ட, காங்கிரஸ், இந்திய கம்யூனிஸ்ட், மார்க்சிஸ்ட் கம்யூனிஸ்ட், விசிக, ஐயூஎம்எல் ஆகிய கட்சிகளின் ஆதரவைப் பெற்றது. கடந்த மே 10-ஆம் தேதி முதல்வராக விஜய் பதவியேற்றார். அவருடன் என்.ஆனந்த், ஆதவ் அர்ஜுனா, அருண்ராஜ், செங்கோட்டையன், வெங்கடரமணன், நிர்மல்குமார், ராஜ்மோகன், பிரபு, கீர்த்தனா ஆகிய 9 பேர் அமைச்சர்களாகப் பொறுப்பேற்றனர். தொடர்ந்து, காங்கிரஸ் கட்சியின் ராஜேஷ்குமார், விஸ்வநாதன் உள்ளிட்ட 23 பேர் அமைச்சர்களாகப் பதவியேற்றதன் மூலம் 59 ஆண்டுகளுக்குப் பிறகு காங்கிரஸ் கட்சி தமிழக ஆட்சியில் பங்கேற்றது. தற்போது விசிக மற்றும் ஐயூஎம்எல் கட்சிகளும் அமைச்சரவையில் இணைந்துள்ளது தமிழக அரசியல் வரலாற்றில் ஒரு முக்கிய நிகழ்வாகப் பார்க்கப்படுகிறது.