தமிழக சட்டப்பேரவைத் தேர்தல் முடிவுகளுக்குப் பிறகு திமுக கூட்டணியை முறித்துக் கொண்டு, நடிகர் விஜய்யின் தவெக அரசுக்கு ஆதரவளித்த விசிக தலைவர் திருமாவளவனின் முடிவுகள், தற்பொழுது அக்கட்சியின் முக்கிய நிர்வாகிகளிடையே கடுமையான விமர்சனங்களை எழுப்பியுள்ளது. இது குறித்துப் பேசியுள்ள விசிக நிர்வாகிகள், இந்தத் தேர்தலில் திருமாவளவன் முன்னெப்போதும் இல்லாத வகையில் மிகுந்த தடுமாற்றத்துடன் செயல்பட்டதாகக் குற்றம் சாட்டியுள்ளனர். திமுகவிடம் கூடுதல் தொகுதிகளைக் கேட்டுப் பெறும் வாய்ப்பு இருந்தும், வெறும் 8 தொகுதிகளுக்கு அவர் அவசரமாகச் சம்மதித்ததாகவும், ஆளூர் ஷா நவாஸ் போன்ற தீவிரக் கட்சி உழைப்பாளர்களைப் புறக்கணித்துவிட்டு, காங்கிரஸ் கட்சியைச் சேர்ந்த ஜோதிமணியைக் காட்டுமன்னார்கோவில் தொகுதியில் வம்படியாகக் களமிறக்கியது தொண்டர்களிடையே கடும் அதிருப்தியை ஏற்படுத்தியதாகவும் அவர்கள் சுட்டிக்காட்டியுள்ளனர்.
தொங்கு சட்டமன்ற கணிப்பும் திமுக மோதலும்
தேர்தல் களம் சூடாக இருந்தபோதே 'தொங்கு சட்டமன்றம் அமையலாம்' எனப் பகிரங்கமாகக் கணித்த திருமாவளவன், தானே காட்டுமன்னார்கோவில் தொகுதியில் போட்டியிட முடிவு செய்தது திமுக தலைமைக்கு அதிர்ச்சியை ஏற்படுத்தியது. இதனால், அவர் எம்பியாக இருக்கும் சிதம்பரம் தொகுதிக்கு மீண்டும் இடைத்தேர்தல் நடத்த கோடிக்கணக்கில் செலவிட நேரிடும் என திமுக அதிருப்தி அடைந்ததால், அவர் பின்வாங்க நேரிட்டது. மேலும், தனக்குச் சாதகமான தொகுதிகள் கிடைக்கவில்லை என்று திருமாவளவன் பொதுவெளியில் புலம்பிய பல புகார்கள் உண்மையில்லை என்று திமுக தரப்பிலிருந்தே தங்களுக்குத் தகவல் வந்ததாக விசிக நிர்வாகிகள் கூறுகின்றனர். இத்தகைய முரண்பாடுகளால் இரு கட்சித் தொண்டர்களுக்கும் இடையே இணக்கம் இல்லாத சூழல் உருவாகி, தேர்தல் களத்தில் விசிகவினர் சரியாக ஒத்துழைக்கவில்லை என்ற நிலையை உருவாக்கியது.
தவெக ஆதரவு மற்றும் அமைச்சர் பதவிப் போட்டி
தேர்தல் முடிவுகள் வெளியான பிறகு, திருமாவளவனைத் தங்களது பக்கம் இழுக்க மு.க.ஸ்டாலின் முயற்சித்த நிலையில், தவெக தரப்பில் இருந்த ஆதவ் அர்ஜுனா கொடுத்த அசைன்மென்ட் படி இடதுசாரிகளுடன் இணைந்து தவெக ஆட்சிக்கு ஆதரவளிக்கும் நிலையை விசிக எடுத்தது. நடுவில், திருமாவளவனை முதலமைச்சராக்க அதிமுக மற்றும் திமுக ஆஃபர் கொடுத்த போதிலும், கம்யூனிஸ்ட் கட்சிகள் தவெக ஆதரவு நிலைப்பாட்டில் உறுதியாக இருந்ததாலும், பாமக அதனை ஏற்காததாலும் விசிகவுக்கு வேறு வழி இல்லாமல் போனது. இறுதியாக தவெக அமைச்சரவையில் வன்னி அரசுவுக்கு அமைச்சர் பதவி பரிந்துரைக்கப்பட்டதில் கட்சிக்குள் கடும் உள்விவகாரப் பூசல் வெடித்தது; திருமாவளவனே அமைச்சராக வேண்டும் என விஜய் விரும்பிய போதிலும், கட்சியில் இன்னொரு பவர் சென்டர் உருவாகக் கூடாது என்ற பயத்தில் வன்னி அரசுவுக்கே வாய்ப்பளிக்கப்பட்டதாகக் கூறி, 'விஜய் ஆர்எஸ்எஸ் பிள்ளை' என்று முன்பு விமர்சித்த திருமா, இப்போது அவரைத் தாங்குவது ஏன் என விசிக வட்டாரமே கேள்வி எழுப்பத் தொடங்கியுள்ளது.