ஆலந்தூரில் முதல்வர் திருமண மாளிகையை திறந்து வைத்தார் உதயநிதி ஸ்டாலின்!

சென்னை பெருநகர் வளர்ச்சிக் குழுமம் (CMDA) சார்பில், ஆலந்தூர் சட்டமன்றத் தொகுதியில் பொதுமக்களின் பயன்பாட்டிற்காகக் கட்டப்பட்டுள்ள 'முதல்வர் திருமண மாளிகை'யை துணை முதல்வர் உதயநிதி ஸ்டாலின் இன்று திறந்து வைத்தார். கடந்த 2024-ம் ஆண்டு மார்ச் மாதம் முதலமைச்சர் மு.க. ஸ்டாலினால் அடிக்கல் நாட்டப்பட்ட இந்தத் திட்டம், மிகக் குறுகிய காலத்திலேயே கட்டி முடிக்கப்பட்டு தற்போது மக்கள் பயன்பாட்டிற்கு வந்துள்ளது. 18.64 கோடி ரூபாய் மதிப்பீட்டில், சுமார் 21,245 சதுர அடி பரப்பளவில் தரைதளத்துடன் சேர்த்து மூன்று அடுக்கு மாடிகளாக இந்த மாளிகை மிக பிரமாண்டமாக உருவாக்கப்பட்டுள்ளது.

அதிநவீன வசதிகளுடன் கூடிய திருமணக் கூடம்

இந்தத் திருமண மாளிகை அனைத்து நவீன வசதிகளையும் உள்ளடக்கியதாகக் வடிவமைக்கப்பட்டுள்ளது. இரண்டாம் தளத்தில் 620 பேர் அமரக்கூடிய குளிரூட்டப்பட்ட பிரதான மண்டபமும், முதல் தளத்தில் ஒரே நேரத்தில் 240 பேர் அமர்ந்து உணவு அருந்தக்கூடிய விசாலமான உணவுக் கூடமும் அமைக்கப்பட்டுள்ளன. மேலும், மணமக்கள் மற்றும் விருந்தினர்கள் தங்குவதற்காகத் தனித்தனியாக ஓய்வறைகள் மற்றும் தங்கும் அறைகள் மூன்றாவது தளத்தில் நேர்த்தியாக உருவாக்கப்பட்டுள்ளன. கட்டிடத்தின் உள்ளே எளிதாகச் செல்ல இரண்டு மின்தூக்கி (Lift) வசதிகளும் செய்யப்பட்டுள்ளன.

பாதுகாப்பு மற்றும் கட்டமைப்புச் சிறப்புகள்

வாகன நெரிசலைத் தவிர்க்கும் வகையில் தரைதளத்தில் 40 கார்கள் மற்றும் 80 இருசக்கர வாகனங்களை நிறுத்தும் வசதி உள்ளது. தடையற்ற குடிநீர் விநியோகத்திற்காக 45,000 லிட்டர் கொள்ளளவு கொண்ட குடிநீர் தொட்டிகளும், அவசர காலப் பாதுகாப்பிற்காக 37,000 லிட்டர் கொள்ளளவு கொண்ட பிரத்யேக தீயணைப்பு நீர்த்தொட்டிகளும் இங்கு நிறுவப்பட்டுள்ளன. சுத்திகரிக்கப்பட்ட குடிநீர் வசதி மற்றும் நவீனக் கழிப்பறைகளுடன் கூடிய இந்த மாளிகை, ஆலந்தூர் பகுதி மக்களுக்குக் குறைந்த செலவில் தரமான ஒரு பொது இடமாக அமையும் என எதிர்பார்க்கப்படுகிறது.