பக்ரீத் பண்டிகை மற்றும் வார இறுதி தொடர் விடுமுறையை முன்னிட்டு பொதுமக்களின் வசதிக்காக சென்னையில் இருந்து தமிழகத்தின் பல்வேறு பகுதிகளுக்கு 3,700 சிறப்பு பேருந்துகள் இயக்கப்படும் என்று போக்குவரத்துத் துறை அதிகாரப்பூர்வமாக அறிவித்துள்ளது.
போக்குவரத்து கழகத்தின் மெகா பிளான்
அரசு விரைவுப் போக்குவரத்துக் கழக மேலாண் இயக்குநர் மோகன் வெளியிட்டுள்ள செய்திக்குறிப்பில், மே 28-ம் தேதி பக்ரீத் பண்டிகை மற்றும் முகூர்த்த நாளாகவும், மே 29-ம் தேதி மற்றொரு முகூர்த்த நாளாகவும் வருவதோடு, அதனைத் தொடர்ந்து வார இறுதி விடுமுறை நாட்களும் வருகின்றன. இதனால் தமிழகம் முழுவதும் வழக்கத்தை விட அதிகமான பயணிகள் பயணம் செய்வார்கள் என எதிர்பார்க்கப்படுகிறது. இதைக் கணக்கில் கொண்டு, தமிழ்நாடு அரசு போக்குவரத்துக் கழகங்கள் தினசரி இயக்கும் பேருந்துகளுடன் சேர்த்து கூடுதல் சிறப்பு பேருந்துகளை இயக்க விரிவான ஏற்பாடுகளைச் செய்துள்ளன.
கிளம்பாக்கம் பேருந்து நிலைய நிலவரம்
சென்னை கிளம்பாக்கம் பேருந்து நிலையத்திலிருந்து திருச்சி, கும்பகோணம், மதுரை, திருநெல்வேலி, நாகர்கோவில், கன்னியாகுமரி, தூத்துக்குடி, கோயம்புத்தூர், சேலம், ஈரோடு மற்றும் திருப்பூர் ஆகிய முக்கிய நகரங்களுக்கு இன்று (மே 26) 475 பேருந்துகளும், நாளை (மே 27) 845 பேருந்துகளும் இயக்கப்பட உள்ளன. மேலும் வியாழன், வெள்ளி மற்றும் சனிக்கிழமைகளில் தினசரி தலா 455 பேருந்துகள் வீதம் இயக்க திட்டமிடப்பட்டுள்ளது.
கோயம்பேடு மற்றும் மாதவரம் சேவைகள்
சென்னை கோயம்பேட்டிலிருந்து திருவண்ணாமலை, நாகை, வேளாங்கண்ணி, ஓசூர் மற்றும் பெங்களூரு ஆகிய இடங்களுக்கு இன்று 80 பேருந்துகளும், மே 27 முதல் மே 30 வரை தினமும் தலா 170 பேருந்துகளும் இயக்கப்பட உள்ளன. இதேபோல் மாதவரம் பேருந்து நிலையத்திலிருந்து இன்று 35 பேருந்துகளும், மே 27 முதல் மே 30 வரை நாள்தோறும் தலா 60 பேருந்துகளும் இயக்கப்படும். இது தவிர பெங்களூர், திருப்பூர், ஈரோடு மற்றும் கோயம்புத்தூர் ஆகிய முக்கிய நகரங்களில் இருந்து பல்வேறு பகுதிகளுக்கு 300 சிறப்பு பேருந்துகள் இயக்கப்படவுள்ளன.
சொந்த ஊர் திரும்பும் பயணிகளுக்கான வசதி
விடுமுறை முடிந்து ஞாயிற்றுக்கிழமை அன்று மக்கள் தங்களது சொந்த ஊர்களில் இருந்து சென்னை மற்றும் பெங்களூரு ஆகிய நகரங்களுக்குத் திரும்புவதற்கு ஏதுவாக, பயணிகளின் தேவையை உணர்ந்து அனைத்து இடங்களிலிருந்தும் அன்றைய தினம் 1,085 சிறப்பு பேருந்துகளை இயக்க போக்குவரத்துத் துறை ஏற்பாடு செய்துள்ளது. இந்த சிறப்பு பேருந்து இயக்கங்களை நெறிப்படுத்தவும் கண்காணிக்கவும் அனைத்து முக்கிய பேருந்து நிலையங்களிலும் போதிய எண்ணிக்கையிலான அதிகாரிகள் நியமிக்கப்பட்டுள்ளனர்.