தமிழகத்தின் 17-வது சட்டமன்றத் தேர்தலில் வெற்றி பெற்ற 233 உறுப்பினர்களும் எம்எல்ஏக்களாகப் பதவியேற்கும் வைபவம் இன்று திங்கள்கிழமை (மே 11) தலைமைச் செயலகத்தில் நடைபெற்றது. தற்காலிக சபாநாயகர் முன்னிலையில் நடைபெற்ற இந்த நிகழ்வில், பெரம்பூர் தொகுதி உறுப்பினராக முதல்வர் ஜோசப் விஜய் முதலில் பொறுப்பேற்றார். அவரைத் தொடர்ந்து என். ஆனந்த் (டி.நகர்), ஆதவ் அர்ஜுனா (வில்லிவாக்கம்), எதிர்க்கட்சித் தலைவராகத் தேர்வாகியுள்ள உதயநிதி ஸ்டாலின் (சேப்பாக்கம்-திருவல்லிக்கேணி) மற்றும் எடப்பாடி கே. பழனிசாமி (எடப்பாடி) உள்ளிட்ட முக்கியத் தலைவர்கள் வரிசையாகப் பதவியேற்றனர்.
ஜெயலலிதாவை நினைத்து உருகிய அதிமுக எம்எல்ஏ
பதவியேற்பு நிகழ்வின் போது கடலூர் மாவட்டம் பண்ருட்டி தொகுதி அதிமுக உறுப்பினர் மோகன் உறுதிமொழி ஏற்ற விதம் அனைவரையும் நெகிழ்ச்சியில் ஆழ்த்தியது. மேடைக்கு வந்த அவர், மறைந்த முன்னாள் முதல்வர் ஜெயலலிதாவின் படத்தை நோக்கி கைகூப்பி வணங்கியதுடன், "மாண்புமிகு புரட்சித்தலைவி அம்மா... நான் முதல் முறையாக இந்தச் சட்டமன்றத்திற்குள் வந்துள்ளேன்" என்று கூறி கண்ணீர் மல்க அழுதார். அதீத உணர்ச்சிவசப்பட்ட நிலையில் துக்கம் தொண்டையை அடைக்க, இந்திய அரசியலமைப்பின் மீது பற்றுறுதி கொண்டு தனது கடமையை நேர்மையாக நிறைவேற்றுவதாகக் கடவுள் அறிய அவர் உறுதிமொழி எடுத்துக் கொண்டார்.
விஜய்யை 'கடவுளாக'க் கருதிய தவெக உறுப்பினர்கள்
மற்றொருபுறம், தமிழக வெற்றிக் கழக உறுப்பினர்களின் பதவியேற்பு அரசியல் வட்டாரத்தில் புதிய விவாதத்தைக் கிளப்பியுள்ளது. தவெக கொள்கை பரப்புச் செயலாளரும் எம்எல்ஏவுமான ராஜ்மோகன் பதவியேற்கும்போது, "கடவுள் ஆணையாக" என்று குறிப்பிடும் தருணத்தில், அவையில் அமர்ந்திருந்த முதல்வர் விஜய்யை நோக்கித் தனது கைகளைக் காண்பித்து உறுதிமொழி ஏற்றார். இதேபோல் மற்றொரு தவெக சட்டமன்ற உறுப்பினரும் விஜய்யையே கடவுளாகச் சித்தரிக்கும் வகையில் சைகை காட்டிப் பதவியேற்றார். தலைவர்கள் மீதான அதீத விசுவாசத்தை வெளிப்படுத்தும் இத்தகைய நிகழ்வுகள் தமிழகச் சட்டமன்ற வரலாற்றில் ஒரு தொடர்கதையாகவே இருந்து வருகின்றன.
வழக்கமான நெறிமுறைகளும் கட்சி விசுவாசமும்
சட்டமன்ற உறுப்பினர்களாகப் பொறுப்பேற்பவர்கள் தங்கள் கட்சியின் மூத்த தலைவர்களையோ அல்லது மறைந்த தலைவர்களையோ நினைவு கூர்ந்து உணர்ச்சிவசப்படுவது தமிழக அரசியலில் வாடிக்கையான ஒன்றாகவே பார்க்கப்படுகிறது. அந்த வகையில், இன்று நடைபெற்ற பதவியேற்பு விழாவிலும் அதிமுக மற்றும் தவெக உறுப்பினர்கள் தங்கள் தலைவர்கள் மீது வைத்துள்ள பிணைப்பை வெளிப்படுத்தினர். இவர்களைத் தொடர்ந்து மற்ற கட்சிகளைச் சேர்ந்த உறுப்பினர்களும் முறைப்படி தங்களது உறுதிமொழியை ஏற்றுக்கொண்டு எம்எல்ஏக்களாகப் பொறுப்பேற்றுக் கொண்டனர்.