சித்ரா பௌர்ணமி விழா: திருவண்ணாமலையில் கிரிவலத்துக்கு சிறப்பு பேருந்து, ரயில் வசதி

சித்ரா பௌர்ணமியை முன்னிட்டு, பல லட்சம் பக்தர்கள் திருவண்ணாமலையில் கிரிவலம் மேற்கொள்வார்கள் என எதிர்பார்க்கப்படுகிறது. தமிழ்நாடு மட்டுமன்றி, ஆந்திரப் பிரதேசம், கர்நாடகா, கேரளா, தெலங்கானா உள்ளிட்ட அண்டை மாநிலங்களிலிருந்தும், வெளிநாடுகளிலிருந்தும் பக்தர்கள் பெருமளவில் வருகை தருவது வழக்கம்.

திருவண்ணாமலையின் ஆன்மீக சிறப்பு

திருவண்ணாமலை பஞ்சபூத ஸ்தலங்களில் அக்னி ஸ்தலமாக விளங்குகிறது. இங்குள்ள மலையே சிவபெருமான் என்று கருதி பக்தர்கள் வழிபாடுகின்றனர். “நினைத்தாலே முக்தி தரும் தலம்” என்ற பெருமையையும் இந்தத் தலம் பெற்றுள்ளது. இங்குள்ள மலை பல யுகங்களைக் கடந்தும் அழியாமல் இருப்பதாகவும், அதன் சுற்றுவட்டாரத்தில் பல சித்தர்கள் வாழ்ந்து வருவதாகவும் நம்பிக்கை நிலவுகிறது.

கிரிவலம் செய்ய உகந்த நேரம்

கோவில் நிர்வாகம் அறிவித்ததன்படி, ஏப்ரல் 30ஆம் தேதி இரவு 9.52 மணியில் இருந்து மே 1ஆம் தேதி இரவு 11.08 மணி வரை கிரிவலம் மேற்கொள்ள உகந்த நேரமாக அறிவிக்கப்பட்டுள்ளது.

கூடுதல் பேருந்துகள்

சென்னை கீழம்பாக்கம் கலைஞர் நூற்றாண்டு பேருந்து நிலையத்திலிருந்து 30.04.2026 அன்று 548 பேருந்துகள், 01.05.2026 அன்று 565 பேருந்துகள் மற்றும் 02.05.2026 அன்று 35 பேருந்துகள் இயக்கப்படுகின்றன.

சென்னை மாதவரம் பகுதியிலிருந்து 30.04.2026 அன்று 186 பேருந்துகள், 01.05.2026 அன்று 174 பேருந்துகள் இயக்கப்படுகின்றன.

அதேபோல், சென்னை அடையாரிலிருந்து 30.04.2026 அன்று 55 பேருந்துகள் மற்றும் 01.05.2026 அன்று 50 பேருந்துகள் இயக்கப்பட உள்ளன.

பயணிகள் நலனை கருத்தில் கொண்டு, இருக்கை மற்றும் படுக்கை வசதி கொண்ட ஏசி பேருந்துகள் 40 எண்ணிக்கையில் சென்னை கீழம்பாக்கத்திலிருந்து 01.05.2026 அன்று திருவண்ணாமலைக்கு இயக்கப்பட உள்ளன.

மதுரை, சேலம், கோயம்புத்தூர், திருநெல்வேலி, நாகர்கோவில், தென்காசி, தூத்துக்குடி உள்ளிட்ட நகரங்களிலிருந்தும் அரசு விரைவு பேருந்துகள் இயக்க ஏற்பாடுகள் செய்யப்பட்டுள்ளன.

முன்பதிவு வசதி

பயணிகள் வசதிக்காக பேருந்து சேவைகளுக்கான முன்பதிவை www.tnstc.in⁠ இணையதளத்தின் மூலம் மேற்கொள்ளலாம் என அதிகாரிகள் தெரிவித்துள்ளனர்.

சிறப்பு ரயில் சேவைகள்

சித்திரா பௌர்ணமி நாளை முன்னிட்டு இந்திய ரயில்வே சார்பில் விழுப்புரம் – திருவண்ணாமலை இடையே சிறப்பு ரயில்கள் இயக்கப்படுகின்றன.

விழுப்புரத்திலிருந்து 30.04.2026, 01.05.2026 மற்றும் 02.05.2026 ஆகிய தேதிகளில் காலை 10.00 மணிக்கு புறப்படும் முன்பதிவில்லா சிறப்பு ரயில்கள், 11.45 மணிக்கு திருவண்ணாமலையை சென்றடையும்.

மறுமார்க்கத்தில், திருவண்ணாமலையிலிருந்து அதே தேதிகளில் மதியம் 12.15 மணிக்கு புறப்படும் ரயில்கள், 1.45 மணிக்கு விழுப்புரத்தை அடையும்.

மெமு ரயில் சேவைகள்

மேலும், விழுப்புரம் – திருவண்ணாமலை இடையே 30.04.2026, 01.05.2026 மற்றும் 02.05.2026 தேதிகளில் முன்பதிவில்லா மெமு ரயில்கள் இயக்கப்படுகின்றன. விழுப்புரத்திலிருந்து இரவு 9.15 மணிக்கு புறப்படும் ரயில், 10.45 மணிக்கு திருவண்ணாமலையை அடையும்.

திருவண்ணாமலையிலிருந்து 01.05.2026, 02.05.2026 மற்றும் 03.05.2026 ஆகிய தேதிகளில் அதிகாலை 2.00 மணிக்கு புறப்படும் மெமு ரயில், 4.00 மணிக்கு விழுப்புரத்தை சென்றடையும்.

இடைநிலையங்கள் மற்றும் கூடுதல் வசதிகள்

இந்த சிறப்பு ரயில்கள் வெங்கடேசபுரம், மாமல்லப்பட்டு, அயந்தூர், திருக்கோவிலூர், அடுத்தனூர், ஆண்டாம்பலம், தண்டரை உள்ளிட்ட இடைநிலையங்களில் நின்று செல்லும் என தெரிவிக்கப்பட்டுள்ளது.

பெரும் திரளான பக்தர்கள் வருகையை முன்னிட்டு, போக்குவரத்து மற்றும் பாதுகாப்பு ஏற்பாடுகள் விரிவாக செய்யப்பட்டுள்ளதாக அதிகாரிகள் தெரிவித்துள்ளனர்.