தமிழ்நாட்டில் அரசு கேபிள் ஒளிபரப்பிலிருந்து மூன்று முன்னணி தனியார் செய்தி சேனல்கள் திடீரென நீக்கப்பட்டுள்ளதாக எழுந்துள்ள குற்றச்சாட்டு பெரும் பரபரப்பை ஏற்படுத்தியுள்ளது. அண்மைக்காலமாக சென்னை மற்றும் அதன் சுற்றுவட்டாரப் பகுதிகளில் மிகக் கடுமையான மின்வெட்டு நிலவி வருகிறது. கோடை வெப்பம் வாட்டி வதைக்கும் சூழலில், அடுத்தடுத்து 3 முதல் 4 மணி நேரம் வரை நீடிக்கும் இந்த தொடர் மின்தடையால் பொதுமக்கள் சொல்லொணாத் துயரத்திற்கு ஆளாகியுள்ளனர். மக்களின் இந்த அவதி குறித்தும், மின்வாரியத்தின் குறைபாடுகள் குறித்தும் பல்வேறு செய்தி சேனல்கள் கள ஆய்வு செய்து தொடர்ந்து செய்திகளை வெளியிட்டு வந்தன. இந்த நிலையில் தான், அரசை விமர்சித்து செய்தி வெளியிட்ட அந்த மூன்று சேனல்களின் ஒளிபரப்பும் அரசு கேபிளில் திடீரென துண்டிக்கப்பட்டதாக தகவல்கள் வெளியாகின.
எதிர்க்கட்சித் தலைவர் உதயநிதி ஸ்டாலின் கடும் சாடல்
ஊடகங்கள் முடக்கப்பட்டுள்ள இந்த விவகாரம் பூதாகரமாக வெடித்துள்ள நிலையில், சட்டமன்ற எதிர்க்கட்சித் தலைவர் உதயநிதி ஸ்டாலின் தமிழக வெற்றிக்கழக அரசை கடுமையாக விமர்சித்து தனது எக்ஸ் (X) வலைதளப் பக்கத்தில் அறிக்கை ஒன்றை வெளியிட்டுள்ளார். அதில், தமிழ்நாட்டை ஆளும் "சோபா மாடல்" அரசின் நிர்வாகத் தோல்விகளைத் திரையிட்டுக் காட்டிய ஒரே காரணத்திற்காக, 3 செய்தி சேனல்களை அரசு கேபிளில் இருந்து நீக்கியுள்ள நடவடிக்கை வன்மையாகக் கண்டிக்கத்தக்கது என்று அவர் குறிப்பிட்டுள்ளார்.
ரீல்ஸ் முதலமைச்சருக்கு உதயநிதி கேள்வி
மேலும் தனது பதிவில் முதலமைச்சரை சாடியுள்ள உதயநிதி, சமூக வலைதள ரீல்ஸ் (Reels) உள்ளடக்கத்திற்காக "என்னை எவ்வளவு வேண்டுமானாலும் விமர்சியுங்கள்" என்று மேடைகளில் பஞ்ச் டயலாக் பேசிய முதலமைச்சர், தற்போது தன் ஆட்சியின் அவலங்களைச் சுட்டிக்காட்டும் செய்தி சேனல்களை முடக்குவது எந்த விதத்தில் நியாயம் என்று கேள்வி எழுப்பியுள்ளார். மின்சாரத் தட்டுப்பாட்டால் பொதுமக்கள் படும் அவதி, மாநிலத்தில் தொடர்ந்து அரங்கேறும் பாலியல் வன்கொடுமைகள் மற்றும் சட்டம் ஒழுங்கு சீர்கேடு போன்ற உண்மைச் சம்பவங்களை ஒளிபரப்பியதால், பாசிசத்தின் மறுவடிவமாக மாறி ஊடகங்களின் குரல்வளையை தமிழ்நாடு அரசு நெரிப்பதாக அவர் குற்றம் சாட்டியுள்ளார்.
உண்மையை மறைக்க முடியாது என எச்சரிக்கை
தொழில்நுட்பக் கோளாறு என அரசுத் தரப்பில் இதற்கு வேறு காரணங்கள் கூறப்பட்டாலும், அரசை விமர்சிக்காத இதர சேனல்களுக்கு எந்தப் பாதிப்பும் ஏற்படவில்லை என்பதை உதயநிதி சுட்டிக்காட்டியுள்ளார். ஊடகங்களை முடக்குவதன் மூலம் தங்களின் தோல்விகளை மறைத்துவிடலாம் என்ற எண்ணத்தை ஆட்சியாளர்கள் கைவிட வேண்டும் என்றும், நீக்கப்பட்ட செய்தி சேனல்களின் ஒளிபரப்பை அரசு கேபிளில் உடனடியாகத் தொடர உரிய நடவடிக்கை எடுக்க வேண்டும் என்றும் அவர் வலியுறுத்தியுள்ளார். இந்தச் சம்பவம் காரணமாக, தமிழகத்தில் ஊடக சுதந்திரம் பறிக்கப்படுகிறதா என்ற விவாதமும், இது திட்டமிட்ட பழிவாங்கலா அல்லது நிர்வாகக் காரணமா என்ற கேள்விகளும் தற்போது அரசியல் வட்டாரத்தில் எழுந்துள்ளன.