தமிழக சட்டப்பேரவை தேர்தலை முன்னிட்டு, நிர்வாக ரீதியிலான முக்கிய மாற்றங்களை இந்திய தேர்தல் ஆணையம் மேற்கொண்டுள்ளது. தேர்தல் நடைபெறும் மாநிலங்களில் ஒரே இடத்தில் மூன்று ஆண்டுகளுக்கு மேலாகப் பணியாற்றும் ஐஏஎஸ் மற்றும் ஐபிஎஸ் அதிகாரிகளை இடமாற்றம் செய்ய வேண்டும் என்ற விதிமுறையின் அடிப்படையில் இந்த அதிரடி உத்தரவு பிறப்பிக்கப்பட்டுள்ளது. முன்னதாக எட்டு மாவட்டங்களின் காவல் கண்காணிப்பாளர்கள் மாற்றப்பட்ட நிலையில், தற்போது மாநிலத்தின் மிக உயரிய பதவிகளிலும் மாற்றங்கள் செய்யப்பட்டுள்ளன.
புதிய தலைமைச் செயலாளர் சாய்குமார் ஐஏஎஸ்
தமிழக அரசின் தலைமைச் செயலாளராகப் பணியாற்றி வந்த முருகானந்தம் மாற்றப்பட்டு, அவருக்குப் பதிலாக சாய்குமார் ஐஏஎஸ் புதிய தலைமைச் செயலாளராக நியமிக்கப்பட்டுள்ளார். 1990-ஆம் ஆண்டு ஐஏஎஸ் பிரிவைச் சேர்ந்த இவர், தமிழ்நாடு மின்சார வாரியம் மற்றும் செய்தித்தாள் காகித நிறுவனம் உள்ளிட்ட பல்வேறு துறைகளில் அனுபவம் வாய்ந்தவர். மேலும், முன்னாள் முதல்வர் எடப்பாடி பழனிசாமியின் தனிச்செயலாளராகவும், முதல்வரின் செயலாளராகவும் பணியாற்றிய பெருமைக்குரியவர். உத்தரவு வெளியானதைத் தொடர்ந்து, சாய்குமார் தலைமைச் செயலகத்தில் முறைப்படி பொறுப்பேற்றுக்கொண்டார்.
புதிய லஞ்ச ஒழிப்புத் துறை டிஜிபி சந்தீப் மிட்டல்
இதேபோல், ஊழல் தடுப்பு மற்றும் கண்காணிப்புத் துறை (லஞ்ச ஒழிப்புத் துறை) டிஜிபியாக இருந்த டேவிட்சன் தேவாசிர்வாதம் மாற்றப்பட்டு, அவருக்குப் பதிலாக சந்தீப் மிட்டல் ஐபிஎஸ் நியமிக்கப்பட்டுள்ளார். 1995-ஆம் ஆண்டு ஐபிஎஸ் பிரிவைச் சேர்ந்த இவர், சைபர் பாதுகாப்பு மற்றும் குற்றவியல் புலனாய்வில் நிபுணத்துவம் பெற்றவர். திகார் சிறை பாதுகாப்புத் துறைத் தலைவர், போதைப்பொருள் தடுப்புப் பிரிவு இயக்குனர் உள்ளிட்ட பல்வேறு முக்கிய பொறுப்புகளை வகித்தவர் என்பது குறிப்பிடத்தக்கது.
தேர்தலை எவ்விதப் புகாருமின்றி, சுதந்திரமாகவும் நேர்மையாகவும் நடத்துவதை உறுதி செய்யும் வகையில் இந்த இடமாற்றங்கள் மேற்கொள்ளப்பட்டுள்ளதாகத் தேர்தல் ஆணைய வட்டாரங்கள் தெரிவிக்கின்றன.