சிவகங்கை மாவட்டம் சிங்கம்புணரி அருகே 5 சிறுமிகளை பாலியல் வன்கொடுமை செய்த வழக்கில், குற்றவாளிக்கு 5 மரண தண்டனைகளை விதித்து சிவகங்கை போக்சோ நீதிமன்றம் வரலாற்றுச் சிறப்புமிக்க தீர்ப்பை வழங்கியுள்ளது.
வழக்கின் பின்னணியும் கைது நடவடிக்கையும்
சிங்கம்புணரி அடுத்த மருதிபட்டியைச் சேர்ந்த 49 வயதான சந்திரன், விறகு வெட்டும் தொழில் செய்து வருபவர். திருமணமான இவருக்கு இரண்டு குழந்தைகள் உள்ளனர். சந்திரன் கடந்த 2023-ம் ஆண்டு முதல், அப்பகுதியைச் சேர்ந்த ஐந்து சிறுமிகளுக்கு தின்பண்டங்கள் மற்றும் பணம் கொடுத்து ஆசை வார்த்தை கூறி பாலியல் வன்கொடுமை செய்துள்ளார். இது தொடர்பாக பாதிக்கப்பட்ட ஒரு சிறுமியின் தந்தை அளித்த புகாரின் அடிப்படையில், 2024 பிப்ரவரி 13 அன்று திருப்பத்தூர் அனைத்து மகளிர் போலீஸார் சந்திரனை கைது செய்தனர். பின்னர் அவர் குண்டர் சட்டத்தின் கீழ் மதுரை மத்திய சிறையில் அடைக்கப்பட்டார்.
நீதிமன்ற விசாரணை மற்றும் தீர்ப்பு விவரம்
இந்த வழக்கு சிவகங்கை போக்சோ நீதிமன்றத்தில் நீதிபதி கோகுல்முருகன் முன்னிலையில் விசாரணைக்கு வந்தது. அரசு தரப்பில் வழக்கறிஞர் தனலெட்சுமி வாதாடினார். விசாரணையில் சந்திரன் மீதான குற்றச்சாட்டுகள் உறுதியாக நிரூபிக்கப்பட்டன. வீடியோ கேம்கள் மற்றும் சிறு தொகையை ஆசையாகக் காட்டி அவர் இந்த கொடூரச் செயலில் ஈடுபட்டது தெரியவந்தது. இதனை ‘அரிதிலும் அரிதான வழக்கு’ எனக் குறிப்பிட்ட நீதிபதி, நீதிமன்றத்தில் உண்மையை தைரியமாகப் பதிவு செய்த சிறுமிகளையும், புகார் அளித்த தந்தையையும் வெகுவாகப் பாராட்டினார்.
தண்டனை மற்றும் இழப்பீடு
குற்றவாளி சந்திரனுக்கு மிரட்டல் விடுத்ததற்காக 2 ஆண்டுகள் சிறையும், ஒரு சிறுமியை வன்கொடுமை செய்ததற்காக 20 ஆண்டுகள் சிறையும் விதிக்கப்பட்டது. மற்ற நான்கு சிறுமிகளை வன்கொடுமை செய்ததற்காக சாகும் வரை நான்கு ஆயுள் தண்டனைகளும் வழங்கப்பட்டன. குறிப்பாக, 12 வயதுக்குட்பட்ட சிறுமிகளைப் பாதிப்புக்குள்ளாக்கிய கொடூரத்திற்காக 5 மரண தண்டனைகளை விதித்து நீதிபதி உத்தரவிட்டார். மேலும், பாதிக்கப்பட்ட 5 சிறுமிகளுக்கும் தலா 7 லட்சம் ரூபாய் இழப்பீடு வழங்க தமிழக அரசுக்கு ஆணையிட்டார். தீர்ப்பை வாசித்து முடித்த நீதிபதி, அதன் முக்கியத்துவத்தைக் குறிக்கும் வகையில் பேனா முனையை உடைத்தார். சிவகங்கை போக்சோ நீதிமன்ற வரலாற்றில் மரண தண்டனை விதிக்கப்படுவது இதுவே முதல்முறையாகும்.