தமிழக முன்னாள் மின்சாரத்துறை அமைச்சர் செந்தில் பாலாஜியின் பதவிக்காலத்தில், சுமார் 45 ஆயிரம் டிரான்ஸ்பார்மர்கள் கொள்முதல் செய்யப்பட்டதில் அரசுக்கு ரூ.397 கோடி நஷ்டம் ஏற்படுத்தியதாகக் கூறப்படும் புகாரினை சிபிஐ விசாரணைக்கு மாற்றி சென்னை உயர் நீதிமன்றம் தீர்ப்பளித்துள்ளது. கடந்த 2021 முதல் 2023 வரையிலான காலப்பகுதியில் நடைபெற்ற இந்த முறைகேடு குறித்து அறப்போர் இயக்கம் மற்றும் அதிமுக வழக்கறிஞர் அணி சார்பில் தொடரப்பட்ட வழக்குகளை விசாரித்த தலைமை நீதிபதி எஸ்.ஏ. தர்மாதிகாரி தலைமையிலான அமர்வு, இது தொடர்பாகப் புதிய விசாரணையைத் தொடங்க சிபிஐ-க்கு உத்தரவிட்டது. மேலும், இது குறித்த ஆவணங்கள் அனைத்தையும் அடுத்த இரண்டு வாரங்களுக்குள் சிபிஐ அதிகாரிகளிடம் ஒப்படைக்க லஞ்ச ஒழிப்புத்துறைக்குக் கெடு விதித்துள்ளது.
இந்த விசாரணைக்குத் தமிழக அரசு, மின்சார வாரியம் மற்றும் லஞ்ச ஒழிப்புத் துறை ஆகியவை முழு ஒத்துழைப்பு நல்க வேண்டும் என்றும், சட்டப்படி உரிய காலத்திற்குள் விசாரணையை முடிக்க வேண்டும் என்றும் நீதிபதிகள் வலியுறுத்தினர். அதேவேளையில், வழக்கை ஒரு சுதந்திரமான விசாரணை அமைப்பிடம் ஒப்படைக்க வேண்டும் என்ற நோக்கத்திலேயே இந்த உத்தரவு பிறப்பிக்கப்பட்டுள்ளதாகவும், இது எவர் மீதான தனிப்பட்ட குற்றச்சாட்டையோ அல்லது தகுதியையோ முடிவு செய்யும் இறுதித் தீர்ப்பு அல்ல என்றும் நீதிமன்றம் விளக்கமளித்துள்ளது. இந்த அதிரடி உத்தரவு தமிழக அரசியல் வட்டாரத்தில் பெரும் பரபரப்பை ஏற்படுத்தியுள்ளது.